Heilbrigðisráðherra hefur ákveðið að tillögu Þórólfs Guðnasonar, sóttvarnarlæknis, að framlengja samkomubann í þeirri mynd sem það er nú, í þrjár vikur til viðbótar eða til 26. júlí. Fjöldatakmarkanir miðast því enn við 500 manns.

Eins verður opnunartími skemmtistaða óbreyttur og aðeins heimilt að hafa opið til 23:00.

Til stendur einnig að efla upplýsingagjöf til almennings um einstaklingsbundnar sýkingavarnir.

Í tilkynningu á vef Stjórnarráðsins segir:

„Frá því að skimanir hófust á landamærum 15. júní síðastliðinn hafi um 22.000 ferðamenn komið til landsins og sýni verið tekin hjá um 16.000 manns (tölur frá 2. júlí). Virk smit hafa greinst hjá sjö einstaklingum og rúmlega 400 manns hafa þurft að fara í sóttkví eftir smitrakningu. Enginn er alvarlega veikur. Sóttvarnalæknir segir um ákveðið bakslag að ræða sem hafi ekki verið óviðbúið en að lágmarka þurfi áhættuna á því að faraldurinn nái sér á strik hér á landi. Tillaga sóttvarnalæknis um að ekki verði slakað frekar á reglum um samkomubann að sinni byggist á þessu, auk þess sem hann leggur áherslu á að efla fræðslu um einstaklingsbundnar sýkingavarnir. Heilbrigðisráðherra hefur sem fyrr segir fallist á tillögu sóttvarnalæknis um að framlengja óbreyttar reglur um takmarkanir á samkomum og verður auglýsing þess efnist birt á næstu dögum í Stjórnartíðindum.“