Stórleikarinn Ian McKellen hefur ekki lagt leikaraskóna á hilluna og bauðst honum nýlega að leika eitt frægasta hlutverk Shakespeare, Hamlet, í breskri uppsetningu þar sem aldur skiptir engu máli.

Fræðimenn hafa lengi velt því fyrir sér hve gamall Hamlet sé í raun og veru, hvort hann sé þrítugur, eins og nefnt er snemma í leikritinu, eða hvort hann sé enn yngri.

50 ár síðan síðast

McKellen sagði frá þessi á Twitter í síðustu viku. Hann segir að hann sé mjög heppinn að fá að vinna aftur og þakkar fyrir möguleikann á því að komast í kynni við Hamlet að nýju.

McKellen tókst nefnilega á við hlutverkið fyrir 50 árum síðan. Þá sagði hann að hann efaðist alltaf þegar leikari væri kallaður Hamlet sinnar kynslóðar. ”Sérstaklega vegna þess að enginn hefur skrifað það um mig” sagði leikarinn þá.

Nú hefur leikarinn aftur á móti öðlast mikla reynslu og er tilbúinn til þess að takast á við hlutverkið að nýju.

Vegna kórónaveirunnar er ekki vitað hvenær leikhúsin í Bretlandi opna að nýju og það gæti því þess vegna verið enn eldri Ian McKellen sem tekst á við Hamlet

Hefur leikið í stórmyndum

Ian McKellen hefur leikið mörg stór hlutverk, bæði á sviði og á hvíta tjaldinu. Meðal þeirra kvikmynda sem hann hefur leikið í eru Hringadróttinssaga, Hobbitinn og X-Men myndirnar. Hann hefur auk þess leikið í mörgum Shakespeare leikritum, meðal annars Macbeth og Othello.

Árið 1991 var hann aðlaður og fékk þar með titilinn sir. Leikarinn kom út úr skápnum árið 1988 og fékk ”Order of the Companions of Honour” fyrir baráttu sína fyrir jafnrétti.