Bjarni Benediktsson, fjármálaráðherra, og Tómas Brynjólfsson, skrifstofustjóri á skrifstofu efnahagsmála fjármála- og efnahagsráðuneytisins, mæta fyrir stjórnskipunar- og eftirlitsnefnd Alþingis á mánudaginn. Fundarefnið er verklag ráðherra við tilnefningar í stöður. Fundurinn verður opinn og hefst klukkan 10.
Tilefni fundarins eru afskipti fjármálaráðuneytisins af ráðningu ritstjóra fræðiritsins Nordic Economic Policy Review, en ráðuneytið lagðist gegn því að hagfræðiprófessorinn Þorvaldur Gylfason fengi stöðuna með vísan til stjórnmálaskoðana hans.
Þórhildur Sunna Ævarsdóttir, formaður nefndarinnar, segir í samtali við DV að það sé eðlilegt að nefndin taki málið til skoðunar.
„Ég er formaður nefndarinnar og tók undir beiðni sem kom frá Guðmundi Andra Thorsson sem er nefndarmaður,“ segir Þórhildur. En upphaflega var það Oddný G. Harðardóttir, þingmaður Samfylkingar, sem skoraði á nefndina að taka málið til skoðunar á Alþingi í vikunni.
„En svo er líka bara sjálfsagt og eðlilegt að við skoðum þetta,“ segir Þórhildur. „Mér finnst þetta mjög óeðlilegt og mér finnst alveg ótrúlegt að forsætisráðherra Íslands styðji þessa svívirðilegu framkomu fjármálaráðherra.“
Þórhildi Sunnu finnst eins óeðlilegt að fjármálaráðherra hafi réttlæt þessi afskipti fjármálaráðuneytisins. „Það er svona þegar maður er búinn að komast upp með valdníðslu í fleiri fleiri ár að þá fer manni bara að finnast það eðlilegt að halda þessu áfram.“
Aðspurð segir hún að það sé ekki nauðsynlegt að ritstjóri slíks fræðirits sé samstíga fjármálaráðuneyti í skoðunum.
„Nei þetta er ekkert stefnumótunarrit fyrir það land sem á ritstjórnin að hverju sinni. Það kemur bara skýrt fram hver áhersla þessa rits er og hvernig valið er í það á heimasíðunni. Það er eitt. En að senda bæði rangar upplýsingar og í raun bara atvinnuróg til félaga sinna, það er annað og stærra mál. Sömuleiðis er ótrúlegt að viðurkenna það að stjórnmálaskoðanir fræðimanna eigi að hafa neikvæðar og alvarlegar afleiðingar fyrir viðkomandi þegar kemur að ráðningu í fræðistörf.“
Hún segir að með þessu sendi stjórnvöld alvarleg skilaboð til fræðasamfélagsins. Þeim sé ekki unnt að beita skoðunar- og tjáningarfrelsi sínu án þess að það hafi afleiðingar.
„Mér finnst þetta bara eitt af mörgum kælandi og mjög lýsandi skilaboðum og aðgerðum stjórnvalda til þess að kæfa og þagga niður upplýsta akademíska sem og samfélagslega umræðu. Það er sýknt og heilagt verið að senda þau skilaboð í þessu landi að ef þú hagar þér ekki í samræmi við það hvernig valdinu hentar, ef þú hagar þér ekki vel, þá færðu ekki vinnu við hæfi, þá verða við því afleiðingar og þetta hefur auðvitað mjög kælandi áhrif á tjáningarfrelsið á Íslandi. Og er skiljanlega valdur af því að margir veigra sér við því að tjá sig opinberlega um skoðanir sínar af ótta við neikvæðar afleiðingar“
Líkt og áður kemur fram verður fundurinn opinn og því verður hægt að fylgjast með honum á mánudagsmorgun, klukkan 10:00.
