Ítalska íþróttafréttakonan Diletta Leotta varð nýlega fyrir því að brotist var inn á heimil hennar í Corso Como hverfinu í Mílanó. Óhætt er að segja að þar hafi hugdjarfir og bíræfnir þjófar verið á ferð því þeir komust inn í íbúðina um glugga. Það er kannski ekki í frásögur færandi nema hvað íbúðin er á níundu hæð.

Ítalskir fjölmiðlar segja að þjófarnir hafi haft peningaskáp á brott með sér. Í honum voru meðal annars átta úr, þar af nokkur Rolex, hringar og sem svarar til um 22 milljóna íslenskra króna í reiðufé.

Leotta var úti að borða þegar þetta gerðist. Hún er þekkt íþróttafréttakona í heimalandinu og fjallar mikið um ítalska knattspyrnu.