Kvikmyndaframleiðandinn Harvey Weinstein virðist hafa reynt ýmislegt til að ásakanir fjölda kvenna gegn honum kæmust aldrei í dagsljósið. Fjölmargar konur hafa stigið fram og sakað hann um kynferðislega áreitni og alvarlegri brot.

Hið virta tímarit New Yorker greinir frá því að hann hafi fengið liðsmenn Black Cube til að grafa upp eitthvað vafasamt úr fortíð þeirra sem ásökuðu hann og blaðamannanna sem vildu fjalla um málið. Black Cube er fyrirtæki sem rekið er af fyrrverandi liðsmönnum Mossad, leyniþjónustu Ísraels.

Í grein Ronan Farrow, sem fjallað hefur um mál Weinsteins að undanförnu, kemur fram útsendarar Black Cube hafi siglt undir fölsku flaggi þegar þeir hittu leikkonuna Rose McGowan í nokkur skipti á síðasta ári. McGowan hefur sakað Weinstein um nauðgun.

Sögðust útsendararnir vera frá samtökum sem kenna sig við jafnrétti kynjanna, en tilgangurinn hafi verið að veiða McGowan í einhverskonar gildru. Útsendarar Black Cube eru einnig sagðir hafa rætt við blaðamenn og aðrar leikkonur við svipaðar kringumstæður. Útsendararnir eru síðan sagðir hafa skrifað skýrslur um hvern og einn.

Svo virðist vera sem Weinstein hafi áttað sig á hvað væri yfirvofandi því hann er sagður hafa haft fyrst samband við Black Cube fyrir um ári síðan. Eins og kunnugt var það á haustmánuðum sem málið komst í hámæli. Weinstein er einnig sagður hafa reynt að nýta sér tengsl við fjölmiðlamenn í sína þágu, til dæmis Dylan Howard hjá American Media Inc. sem meðal annars gefur út blaðið National Enquirer.