Egill Þór Jónsson, borgarfulltrúi Sjálfstæðisflokksins, telur þögnina frá stjórnarmönnum Sorpu vegna fyrirspurna um starfsemi stöðvarinnar, vera brot á siðareglum fyrirtækisins. Þetta kemur fram í grein hans í Fréttablaðinu í dag þar sem hann fjallar um Sorpumálið.
Egill bendir á að í siðareglum Sorpu segi að stjórnarmenn skuli „bera ábyrgð gagnvart íbúum höfuðborgarsvæðisins í heild og svara fyrirspurnum almennings og fjölmiðla um störf sín með rökstuðningi fyrir aðgerðum eða starfsemi þjónustu sem þeir bera ábyrgð sem kjörnir fulltrúar í stjórn Sorpu.“
Líf Magneudóttir, borgarfulltrúi VG, er eini fulltrúi Reykjavíkurborgar í stjórn Sorpu.
Egill nefnir að á síðasta borgarstjórnarfundi hafi verið óskað eftir svörum frá meirihlutanum um málið, án árangurs:
„Á áðurnefndum fundi óskuðu fulltrúar minnihlutans eftir svörum við ýmsum spurningum en fengu engin svör. Sumir brugðu á það ráð að spyrja aftur, en engin svör bárust.“
Egill nefnir einnig að þegar óskað var svara um málið á fundinum, hafi meirihlutinn sakað minnihlutann um að leggja sig í einelti:
„…hljóp fulltrúi Samfylkingar upp í pontu og sakaði alla þá sem spurðu spurninga um ítrekað einelti í garð borgarfulltrúa Vinstri grænna sem jafnframt er eini fulltrúi Reykjavíkur í stjórn Sorpu. Fyrir það eitt að spyrja spurninga. Er það einelti að leita svara við spurningum um milljarða verkefni sem er fjármagnað af skattgreiðendum? Er það einelti að beina spurningum til kjörinna fulltrúa sem fá greitt fyrir ábyrgð og setu í stjórnum fyrir hönd borgarinnar? Þær vangaveltur skil ég eftir hjá borgarbúum Reykjavíkurborgar. Þetta er að minnsta kosti ný aðferð meirihlutans í Reykjavík til að kasta ábyrgðinni frá sér.“
Þá má geta þess að í umfangsmikilli umfjöllun Stundarinnar um hina nýju stöð Sorpu, kemur fram að illa gangi að ná tali af stjórnarmönnum og forsvarsmönnum fyrirtækisins, þrátt fyrir ítrekaðar tilraunir. Hins vegar hafi framkvæmdastjórinn séð sér fært um að koma fram í öðrum fjölmiðlum.
Sorpumálið hefur verið mikið í fréttum undanfarið, en ný gas- og jarðgerðarstöð hefur farið langt fram úr kostnaði og er af erlendum sérfræðingum talin úrelt. Þá er mikil óvissa varðandi afurðir stöðvarinnar, sem er molta og metangas, en engir samningar liggja fyrir varðandi söluna á metangasinu og er eftirspurnin lítil. Þá er moltan úr stöðinni sögð ófullnægjandi að gæðum. Hefur Gasið því verið brennt og moltan urðuð, en stöðin hefur hingað til kostað 5,3 milljarða og hefur farið 1,6 milljarða fram úr kostnaðaráætlunum. Samkvæmt Stundinni liggur endanlegur kostnaður ekki fyrir, en viðbúið er að enn eigi eftir að bætast við kostnaðinn.
Uppfært – Líf bregst við
Líf brást við grein Egils og sagði við Eyjuna að svörin hefðu vissulega borist:
„Ég skil ekki hvaðan hann er að koma. Ég svaraði öllum þeirra spurningum samviskusamlega í ræðu á borgarstjórnarfundi. Þegar ég síðan sá hvernig mælendaskráin fylltist af fulltrúum Sjálfstæðisflokksins og fólk þar setti sig aftur og aftur á mælendaskrá og jafnvel áður en það hafði tekið til máls eða lokið máli sínu ákvað ég að bíða og spara ræðutíma minn, hlusta á umræður og taka niður spurningar og vangaveltur frá borgarfulltrúum. Síðan setti ég mig aftast á mælendaskrá til að svara því sem út af stóð. Ég tel að það hafi tekist. Aðrir borgarfulltrúar meirihlutans sem tóku til máls á undan mér svöruðu einnig spurningum sem vöknuðu þannig að ég taldi óþarfi að endurtaka þau svör. Það er auðvitað leiðinlegt ef borgarfulltrúar Sjálfstæðisflokksins hlusta ekki á það sem fram fer í borgarstjórn eða það sem ég segi í ræðustól. Þeir geta þá bara rætt við flokksfélaga sína úr öðrum sveitarfélögum sem sitja í Sorpu ef þeim hugnast ekki að fá svör frá vinstrikonu.“
Sjá einnig: Nýja stöðin talin úrelt og gölluð – Kostaði 5,3 milljarða -„Nýtt Sorpuhneyksli“
Sjá einnig: Nýjar vendingar í Sorpumálinu – „Heimsmeistari í ósannindum“
