Á sunnudaginn var James Schmidt, 28 ára Dani af súdönskum uppruna, dæmdur í lífstíðarfangelsi fyrir tvö ránmorð sem hann framdi í mars á síðasta ári. Hann var sýknaður af ákæru um þriðja morðið því búið var að brenna líkið þegar rannsókn hófst og því var ekki hægt að kryfja það. Fórnarlömbin voru ellilífeyrisþegar á níræðisaldri.

Schmidt var sakfelldur fyrir að hafa myrt tvo íbúa í sama fjölbýlishúsinu en sýknaður af að hafa myrt þann þriðja, 83 ára konu. Hann var einnig sakfelldur fyrir að hafa stolið greiðslukortum og fleiri munum frá fórnarlömbunum. Það komst upp um hann vegna notkunar hans á greiðslukortunum.

Í upphafi yfirsást lögreglunni að eitthvað væri grunsamlegt við dauðsföllin og því hófst rannsókn á málunum ekki fyrr en árvökulir ættingjar vöktu athygli lögreglunnar á að greiðslukort fórnarlambanna höfðu verið notuð eftir andlát þeirra.

Við dómsuppkvaðninguna sagði dómarinn að Schmidt hefði gerst sekur um tvö morð og þjófnaði. Ekkert hefði komið fram í málinu sem gæti mildað refsinguna og því skuli Schmidt sitja í fangelsi til æviloka. Í Danmörku er refsingin fyrir ránmorð venjulega 16 ára fangelsi en saksóknari krafðist ævilangs fangelsis þar sem um tvö morð væri að ræða og vegna fyrri dóma sem Schmidt hefur hlotið.

„Ég veit að lífstíðarfangelsi er lítil huggun fyrir fórnarlömbin og fjölskyldur þeirra. En þetta er sanngjörn afleiðing þess að fremja svo hryllilega glæpi eins og ákærði gerði. Lífstíðarfangelsi á að tryggja samfélagið og okkur öll fyrir að hann geti ekki gert þetta aftur. Sú hætta er svo sannarlega fyrir hendi og við getum ekki leyft því að gerast.“

Sagði Søren Harbo, saksóknari, eftir dómsuppkvaðninguna.

Geðrannsókna var gerð á Schmidt og var niðurstaða lækna að hann sé „hættulegur“ og með „mjög afbrigðileg og mikil einkenni geðveiki“. Af þeim sökum telja læknarnir miklar líkur á að hann muni aftur fremja alvarleg afbrot ef hann gengur laus.

Verjandi Schmidt áfrýjaði dómnum strax til Landsréttar.

2012 mildaði Hæstiréttur dóm yfir Schmidt en hann hafði verið dæmdur til ótímabundinnar vistunar í fangelsi fyrir morðtilraun og nauðgun þegar hann var á unglingsaldri. Hæstiréttur mildaði dóminn í sjö ára fangelsi. Á meðan hann afplánaði dóminn hlaut hann dóm fyrir árás á tvo fangaverði. Hann fékk ekki reynslulaus og afplánaði því dóminn að fullu í fangelsi því Fangelsismálastofnun mat það sem svo að samfélaginu stafaði hætta af honum.