„Ég vildi óska að öll börn væru eins heppin með aðstæður og ég, en svo er ekki. Við getum samt reynt okkar besta til þess að hjálpa þeim sem þurfa aðstoð og sýna í verki að okkur þykir vænt um þau, “ segir Margrét Sól Aðalsteinsdóttir sem vakið hefur athygli með frumsömdu lagi um það óréttlæti sem börn í Sýrlandi þurfa að þola.

Margrét Sól er 15 ára og stundar nám í alþjóðlegum skóla í Genf. Myndbandið birti hún á facebook síðu sinni ásamt eftirfarandi texta: „Ég átti að vinna verkefni um eitthvað sem ég hef mikinn áhuga á og ég ákvað að fjalla um óréttlæti gagnvart börnum á Sýrlandi. Ég samdi þetta lag og texta og gerði myndband og setti á Youtube til að reyna að fá fleira fólk til umhugsunar um að hvert einasta barn er einstaklingur og nýtur réttinda sama hvaðan það kemur.“

„Gítarkennarinn minn Patricia hjálpaði mér að útsetja gítarinn og spilar með mér og Bergur í Grísalappalísu, sem er kærasti systur minnar, hjálpaði mér með bassa,“ segir Margrét jafnframt og hvetur fólk til að deila laginu og hjálpa börnunum í Sýrlandi. „Til dæmis með því að styðja UNICEF sem lánaði mér myndir fyrir myndbandið. Þau eru að gera frábæra hluti.“