Gareth Bale leikmaður Real Madrid er ekki vinsæll hjá stuðningsmönnum félagsins og veit af því. Hann skilur ekki hvers vegna stuðningsmenn félagsins haga sér svona þegar á móti blæs.
Zinedine Zidane hefur viljað losna við Bale en ekkert hefur gengið þar. Bale þénar rosalega vel hjá Real Madrid og er ekkert á förum.
„Það er pressa í hverjum leik, ef við spilum ekki vel þá eru læti. Ég hef upplifað að 80 þúsund einstaklingar hafi baulað á mig, ég skil það ekki. Þegar illa gengur þá áttu von á því að stuðningsmenn þínir standi við bakið á þér og hjálpi þér að komast í gang,“ sagði Bale þegar hann var spurður um málið.
Bale hefur mátt þola mikla gagnrýni fyrir ást sína á golfi en hann fer í golf í hvert einasta sinn sem tækifæri er til og er hann sagður hafa meiri áhuga á golfi en að spila fyrir Real Madrid.
Það má segja að Bale hafi gefið stuðningsmönnum Real Madrid gott golfhögg í gær þegar hann fagnaði á æfingu með því að æfa golfsveifluna sína.