Tónlistarmaðurinn Auður frumsýndi síðastliðin föstudag tónlistarmyndband í sjónvarpsþættinum Vikan með Gísla Marteini, sem er á RÚV. Myndbandið er hátt í níu mínutur að lengd, en öll plata hans Ljós, kemur fyrir í myndbandinu. Í dag fóru netverjar að benda á að líklega hefði Auður fengið innblástur, eða stolið hugmynd frá öðru myndbandi.

Snemma í myndbandi Auðs er mikið um tæknibrellur, þar sem að borð, sófar og veggir eru tengdir á ansi sérstakan þátt. Sumum þótti þessar brellur minna á Apple-auglýsingu tónlistarkonunnar FKA Twigs og kvikmyndagerðarmannsins Spike Jonze frá árinu 2018.

Fólk virðist ekki vera sammála um hvort að um sé að ræða innblástur eða stuld á höfundarverki, en eftirfarandi ummæli eru frá netverjum sem tjáðu sig um málið á Twitter.

„Þessi Auður virðist mjög iðinn við að sækja sínar hugmyndir í höfundarverk annarra.“

„Þetta heitir innblástur og góðir listamenn eru ekki hræddir við að viðurkenna það.“

„Það er nú samt alveg munur á innblæstri og að taka nákvæmlega sama concept og einhver annar. Ef ég tek heila efnisgrein úr ritgerð einhvers og set í mína óbreytta þá er það samt ritstuldur þótt ritgerðin sé ekki öll eins.“

„Á skalanum „innblástur til höfundarverk annara“ þá þykir manni þetta halla meira til hægri, af því þetta er svo bókstaflegt. Þetta er samt áhugaverð umræða. Hvenær ferðu yfir innblásturs-strikið? Þú getur upp að vissu marki talað um innblástur áður en þetta er orðinn stuldur.“

Auður hefur sjálfur ekki tjáð sig um málið, en ekki náðist í hann við vinnslu þessarar fréttar. Umræða þessi minnir að talsverðu leiti á mál sem átti sér stað snemma í ár, en  þá var Auður ásakaður um lagastuld.

Hér að neðan má sjá bæði myndböndin, dæmi hver fyrir sig.