Sex ára drengur hlaut alvarleg innvortis meiðsl þegar hann drakk stíflueyði á heimili sínu skömmu fyrir jól. Drengurinn taldi sig vera að drekka vatn en áttaði sig of seint á mistökunum. Þá þegar var hann búinn að kyngja efninu sem er gríðarlega ætandi. Foreldrar drengsins hvetja aðra foreldra til að vera á varðbergi gagnvart hættulegum efnum á heimili sínu.

Drengurinn sem um ræðir heitir Sonny Arthut og er frá Essex á Englandi. Betur fór en á horfðist og er hann nú á þokkalegum batavegi þrátt fyrir alvarleika meiðslanna. Þó er ljóst að langur tími mun líða þar til drengurinn nær sér að fullu, ef hann gerir það þá á annað borð.

„Við reiknum með því að hann muni glíma við þetta það sem eftir er. Þetta var það alvarlegt,“ segir móðir hans, Victoria, í samtali við breska fjölmiðla. Nefnir hún sem dæmi að Sonny fái næringu í gegnum sondu. Victoria og eiginmaður hennar, Ian, eiga sex börn, þar á meðal Sonny. „Við erum öllu vön en við áttum ekki von á þessu,“ segir hún.

Victoria hafði verið að þrífa baðherbergið á heimilinu þegar Sonny drakk stíflueyðinn. „Ég sagði honum að fara ekki strax inn á baðherbergið en ég sagði honum ekki að snerta ekki flöskuna sem stóð við baðvaskinn. Hann lagði ekki saman tvo og tvo,“ segir hún og hvetur foreldra barna til að passa upp á hættuleg efni innan veggja heimilisins. Gæta þurfi þess að börn komist ekki í ætandi efni.

„Þetta var sannkallað furðuslys (e. freak accident) og hefði getað gerst hjá hverjum sem er,“ segir hún.