Staða geðheilbrigðismála á Íslandi hefur lengi þótt afgangsstærð og málaflokkurinn ekki fengið þá athygli og það fjármagn frá heilbrigðisyfirvöldum sem hann á skilið. Áætlað er að heilbrigðisyfirvöld veiti um 10 prósentum af heildarútgjöldum sínum til geðheilbrigðismála. Ekki er hægt að fyllast sérstakri bjartsýni um að það breytist á næstunni, þó sjaldan hafi þótt meira tilefni til, vegna áhrifa Covidkreppunnar.

Verður áfram rifist um peninga

Einar Þór Jónsson er formaður Geðhjálpar, en samtökin vinna að því að bæta hag fólks með geðraskanir og geðfötlun. Hann segir í helgarblaði DV að fleiri hafi leitað til samtakanna en áður strax í mars og vonar að málaflokkurinn fái þá athygli stjórnmálamanna sem hann eigi skilið:

„Sjálfur kýs ég að horfa á ljósið í myrkrinu, þó svo útlitið sé dökkt núna. Ég trúi því samt að skilningur og velvild aukist fyrir okkar málaflokki í framhaldinu, en auðvitað verður áfram rifist um peninga. Ég held að maður verði að vera raunsær og búast við niðurskurði í heilbrigðiskerfinu og á fleiri stöðum. Maður veit ekkert hvernig haldið verður á málum en auðvitað vonar maður að stjórnmálamenn átti sig á því að forvarnir í geðheilbrigðismálum hafa aldrei verið mikilvægari en einmitt nú. Það höfum við lært frá bankahruninu, að ef ekki verður tekið á málum strax, mun þjóðin fá það í bakið síðar meir, með miklu meira umfangi og kostnaði en ella.“

Þetta er brot úr umfjöllun Eyjunnar um geðheilbigðismál á tímum Covidkreppu í helgarblaði DV.