Samkvæmt fréttum belgískra og hollenskra fjölmiðla þá greindist Soubry með smit þegar hann kom frá Wuhan. Hann var í kjölfarið settur í einangrun og var í henni þar til staðfest hafði verið með tveimur prufum að hann væri ekki lengur smitaður. Hann veiktist hins vegar aldrei, fékk aldrei beinverki, hósta eða önnur einkenni sjúkdómsins en smitaður var hann.
Þegar staðfest hafði verið að hann væri laus við smitið sagði læknir hans honum að hann þyrfti ekki að hafa frekari áhyggjur, hann gæti ekki smitast aftur. Það byggði hann á þeirri vitneskju sem við höfum um aðrar kórónuveirur en þetta hefur ekki verið sannað á óyggjandi hátt varðandi þessa veiru.
Síðan kom í ljós að þetta átti ekki við um Soubry.
„Ég hélt að ég væri alveg öruggur hvar sem ég færi.“
Sagði hann þegar niðurstaðan lá fyrir og var augljóslega brugðið.
Katrien Lagrou, hjá Háskólasjúkrahúsinu í Leuwen, segir að líklega megi skýra þetta með því að veiran hafi aldrei gert Soubry veikan og hann hafi ekki fengið nein einkenni hennar. Hjá sjúklingum, sem veiktust af völdum veirunnar, hafi mótefni gegn henni fundist í líkama þeirra. Hún segir að frekari rannsókna sé þörf á þessu og eins og staðan sé núna sé enginn öruggur.
