Þetta er mikil breyting ef miðað er við árið 2015 en þá komu um 16.000 fleiri flóttamenn til landsins en yfirgáfu það. Mattias Tesfaye, ráðherra útlendingamála, segir þetta góða þróun.
„Stefna ríkisstjórnarinnar er jú að flóttamenn dvelji aðeins tímabundið í Danmörku. Þegar mögulegt er, er bara eðlilegt, að flóttamenn fari aftur heim. Ég er ánægður með að við getum veitt fólki vernd þegar það hefur þörf fyrir. En ég gleðst einnig í hvert sinn sem flóttamaður getur farið aftur heim.“
Er haft eftir honum í fréttatilkynningu.
Í samantektinni kemur fram að það voru aðallega flóttamenn frá Sómalíu, Sýrlandi, Írak og Bosníu sem yfirgáfu Danmörku á síðasta ári. Hvað varðar flóttamenn frá Erítreu, Íran og Afganistan þá komu fleiri þaðan til Danmerkur en yfirgáfu landið.
Jótlandspósturinn hefur eftir Eva Singer, hjá Dansk Flygtningehjælp, að það sé ekki stefna ríkisstjórnarinnar og þingsins sem valdi þessari þróun. Hér sé frekar um að ræða breytta heimsmynd frá 2015 og 2016 þegar margir flóttamenn komu til Evrópu. Flóttamönnum hafi ekki fækkað í heiminum síðan þá, þvert á móti. Þeir eigi hinsvegar erfiðara með að komast til Danmerkur en áður. Hún sagði að meðal annars eigi samningur ESB og Tyrklands, um að Tyrkir loki landamærum sínum fyrir flóttamönnum þannig að þeir komist ekki til Evrópu, þar hlut að máli.
