Alþjóðasamtök flugfélaga, IATA, telja að verð á flugmiðum muni hækka um 50 prósent og jafnvel meira þegar flugsamgöngur fara að komast í fyrra horf. Samtökin telja einnig að það muni gera endanlega út af við mörg flugfélög ef það verður krafa til framtíðar að miðjusætin verði auð til að koma í veg fyrir kórónuveirusmit.

Samtökin segjast styðja hugmyndir um að farþegar og áhafnarmeðlimir noti munnbindi á meðan á flugi stendur en geti ekki stutt hugmyndir um að halda verði ákveðinni fjarlægð í farþegarýmum því það hafi í för með sér að miðjusætin verði að standa auð. Það muni auka kostnað flugfélaga gríðarlega.

IATA telur að það séu litlar líkur á að kórónuveiran dreifist í flugvélum sem séu þéttsetnar. Það séu síur í lofthreinsikerfi vélanna sem geri það að verkum að erfitt sé fyrir veiruna að berast um vélarnar.

Flugfélög um allan heim hafa almennt farið illa út úr COVID-19 heimsfaraldrinum og lítið er um farþegaflug. Mörg flugfélög ramba á barmi gjaldþrots og hafa stjórnvöld þurft að hlaupa undir bagga með mörgum félögum.