Þremur dögum síðar birti Shulepov annað myndband á YouTube þar sem hann dró, það sem hann kallaði „tilfinningaþrungnar“ ásakanir til baka. Hann sagðist vera með kvef en liði annars vel. Hann sagði einnig að Kosyakin og hann sinntu ekki sjúklingum og hefðu verið teknir af vöktum.
En þar með lauk málinu ekki því á laugardaginn stórslasaðist Shulepov þegar hann féll út um glugga á sjúkrahúsi þar sem hann lá inni vegna COVID-19 smits. Hann höfuðkúpubrotnaði og þarf nú að takast á við þá áverka auk COVID-19. Lögreglan í Voronezh, þar sem sjúkrahúsið er, rannsakar nú málið. Það gerir mál hans enn dularfyllra að þetta var í þriðja sinn á tveimur vikum sem heilbrigðisstarfsmaður féll út um glugga.
The Moscow Times skýrir frá þessu. Fram kemur að Natalya Lebedeva, læknir, hafi látist eftir að hún féll út um glugga á sjöttu hæð. Hún hafði áður verið sökuð um að bera ábyrgð á útbreiðslu COVID-19 á sjúkrahúsinu sem hún starfaði á nærri Moskvu.
Þann 25. apríl féll Yelena Nepomnyashchaya út um glugga á fimmtu hæð Krasnoyarsk héraðssjúkrahússins. Starfsfélagar hennar segja að skömmu áður hafi hún kvartað yfir skorti á hlífðarbúnaði.
Í byrjun apríl skýrði Amnesty International frá máli Anastasia Vasiliyeva læknis. Hún hafði opinberlega kvartað undan skorti á hlífðarbúnaði fyrir þá sem meðhöndla COVID-19 sjúklinga. Hún var handtekin og lamin af lögreglumönnum á þeim sex klukkustundum sem hún var í haldi. Hún var síðan kærð fyrir brot á reglum um neyðartilvik.
Fyrrnefndur Alexander Kasyakin hefur nú verið kærður fyrir að dreifa falsfréttum en við því liggur allt að fimm ára fangelsi.
