Samkvæmt nýrri rannsókn dr. Hermundar Sigmundssonar, prófessors í lífeðlislegri sálfræði við Háskólann í Reykjavík og Norska tækni- og vísindaháskólann í Þrándheimi, er greinilegur munur á kynjunum. Greint er frá þessu í Morgunblaðinu í dag.

Niðurstöðurnar eru sagðar hafa vakið mikla athygli, en 146 íslenskir háskólastúdentar á aldrinum 22-23 ára voru rannsakaðir.

„Samspil sterks áhuga eða ástríðu og þrautseigju er gríðarlega sterkt hjá strákunum en ekki eins hjá stelpunum. Þær eru miklu jafnari og svipað sterkar hvað varðar ástríðu, þrautseigju og hugarfar grósku,“

er haft eftir Hermundi og að sterkur áhugi hafi afgerandi áhrif á það hvort karlar nái árangri á tilteknu sviði fyrir 55 ára aldur, það sé áhuginn sem sé þeirra helsta driffjöður.

Ástríða og þrautsegja

Þá hafa próf Hermundar leitt í ljós að töluverð fylgni sé á milli ástríðu og þrautseigju hjá venjulegum háskólanemum á Íslandi. Og niðurstöður könnunar um hugarfar og grósku leiddu í ljós sterkan mun á kynjunum þegar þær voru bornar saman. Samkvæmt norskri rannsókn helst munurinn á kynjunum til 55 ára aldurs.

Munurinn skýrist í skólakerfinu

Hermundur minnist á slakan lesskilning pilta hér á landi sem standi þeim dönsku og norsku að baki. Og þegar áskorunin sé of mikil miðað við færni, sé afleiðingin kvíði og minnkandi lesáhugi. Hermundur segir að taka verði tillit til þessa munar á strákum og stelpum:

„Skólakerfið er gert fyrir duglegar stelpur. Þær standa sig best bæði í skólum á Íslandi og í Noregi,“ segir Hermundur og nefnir að konur séu í meirihluta nemenda í krefjandi námsgreinum háskóla, vegna betri einkunna. Þá telur hann skort á eftirfylgni með nemendum á fyrstu skólastigum. Hún sé betri í Noregi. Þá segir hann að leggja þurfi meiri áherslu á að kenna grunnfærni í byrjun, áður en nemendur eigi að beita þekkingunni.

Þarf að brjóta upp daginn

Hermundur hefur smíðað líkan byggt á rannsóknum, til að skipuleggja skóladaginn:

 „Ef við segjum að lestur, stærðfræði og náttúrufræði séu mikilvægustu fögin þá tökum við þau fyrir hádegi í 40 mínútur hvert, ekki lengur. Svo tökum við líka hreyfingu fyrir hádegið. Hún eflir einbeitingu og vellíðan. Eftir hádegismat höfum við einn 40 mínútna þjálfunartíma eða heimanámshjálp í lestri og stærðfræði fyrir nemendur sem fá ekki hjálp heima. Með því er hægt að tryggja að 95% nemenda verði orðin vel læs eftir annan bekk. Svo sameinast þessir nemendur hinum og þá er hægt að taka tvær 40 mínútna kennslustundir í samfélagsfræði eða erlendum tungumálum. Einn tími fyrir alla nemendur gæti verið ástríðutími. Þá væri val um t.d. að fara í skák, tónlist, forritun, leiklist eða myndlist.“

Hermundur telur einnig mikla þörf á lestrarþjálfun, huga þurfi að einstaklingsnámi og áhugasviði nemenda.