„Fulltrúar Samfylkingarinnar í fjárlaganefnd og efnahags- og viðskiptanefnd Alþingis hafa beðið um sameiginlegan nefndarfund vegna vanda Icelandair. Samfylkingin telur afar mikilvægt að funda um stöðuna á breiðum grundvelli og að þessar tvær þingnefndir Alþingis taki málið til umfjöllunar,“ segir í fréttatilkynningu frá Samfylkingunni. Einn þingmannanna, Ágúst Ólafur Ágústsson, segir í viðtali við DV að hann telji vel koma til greina að ríkið komið að rekstri Icelandair sem hluthafi.
„Það er óvenjulegt að nefndir Alþingis fundi saman en við teljum vera ríkt tilefni til að staða Icelandair verði rædd á vettvangi þingsins. Þetta má ekki bara verða prívat samtal milli félagsins og einhverra ráðherra og ég tel mikilvægt að þingið komi inn í þetta samtal. Við munum kalla eftir upplýsingum um hvernig staðan er og hvaða möguleikar eru fyrir hendi en mér er ofarlega í hug að verja starfsemi annars vegar og verja störf hins vegar. Þetta fyritæki er bara svo mikilvægt. Ef það er eitthvert flugfélag í Evrópu sem er mikilvægt fyrir eitt hagkerfi þá er þá er það Icelandarr. Ein af þeim leiðum sem hljóta að koma til greina er að ríkið komi með einhverjum hætti inn í Icelandair sem hluthafi,“ segir Ágúst Ólafur.
Ríkið á þá að taka þátt í rekstri félagsins?
„Mér finnst það fullkomlega koma til greina. Mér finnst mikilvægt að við séum ekki föst í einhverri gamaldagshugsun um að þjóðnýta tapið og einkavæða hagnaðinn. Ef almenningur kostar til fjármunum til að bjarga svona fyrirtæki þá á almenningur að njóta góðs af því þegar uppbyggingin hefst. Síðan er hægt að selja hlut ríkisins þegar fram líða stundir.“
Ágúst Ólafur segir þetta þó bara vera eina af leiðunum sem koma til greina en aðalatriðið sé að Icelandair verið forðað frá falli:
„Lykilatriði er samt að við megum ekki missa Icelandair. Þetta er kerfislega mikilvægt fyrirtæki. Ef þetta er orðið það mikilvægt fyrirtæki að við getum ekki látið það falla, þá finnst mér koma til greina að ríkið komi að rekstri fyrirtækisins sem eigandi. En þetta er bara ein af leiðunum sem koma til greina. Við megum ekki festast í einhverjum gömlum hægri kreddum. Mörg þúsund starfsmenn reiða sig á Icelandair, íslenskt hagkerfi reiðir til á Icelandair og Icelandair má ekki falla.“
Eins og við greindum frá fyrr í dag er ágreiningur um það meðal stjórnarliða með hvaða hætti ríkið eigi að koma Icelandair til aðstoðar. Óli Björn Kárason hjá Sjálfstæðisflokki vill ekki að ríkið taki þátt í rekstri félagsins en segir að ríkið gæti þó veitt því lán. Við þessu hefur Rósa Björk Brynjólfsdóttir, þingmaður VG brugðist:
„Seint munum við Óli Björn vera sammála um afskipti ríkisins af efnahagsmálum og kemur það því engum á óvart að ég ósammála yfirlýsingum hans um að hann sé á móti því að ríkið taki þátt í rekstri Icelandair við þessar aðstæður.“
Hún segir að leiðin sen Óli Björn vill fara sé í raun ríkisstyrkur án skilyrða:
„Reyndar er hann mjög óskýr í sínum orðum og vill ekki að ríkið taki þátt í rekstri félagsins en að það sé í lagi að ríkið styðji við það með lánum með þeim skilyrðum að aðrir hluthafar láni fyrirtækinu líka og að ríkið eigi að greiða laun starfsmanna í uppsagnarfresti. Þessar tillögur eru í raun ríkisstyrkur en án allra skilyrða !! Nema auðvitað til að tryggja hag hinna hluthafanna í fyrirtækinu…sem eiga skv. Óla Birni að lána EF rikið lánar. Á svona tímum er ekkert pláss fyrir neina feimni eða frjálshyggju í dulargervi þegar kemur að ríkisafskiptum af stórum og þjóðhagslega mikilvægum fyrirtækjum á borð við Icelandair.“
