Á fimmtudaginn tilkynntu bandarísk stjórnvöld að þau ætli að styrkja Grænlendinga um 83 milljónir danskra króna en það svarar til rúmlega 1,6 milljarða íslenskra króna. Við það tækifæri sagði Carla Sands, sendiherra Bandaríkjanna í Danmörku, að með þessu vildu Bandaríkin aðstoða Grænlendinga við að verjast „illgjörnum áhrifum og þrýstingi“ frá Kína og Rússlandi.

Vladimir V. Barbin, sendiherra Rússlands í Danmörku, er ekki sáttur við þetta og segir að þegar Bandaríkin tengi fjárstuðninginn beint við harða gagnrýni á Rússland ógni þeir friði á Norðurheimskautasvæðinu.

Þetta hefur Politiken eftir Barbin. Hann segir að miðað við ummæli Sands séu Bandaríkin að segja að þau ætli að rekja átakapólitík um málefni norðurslóða í stað þess að starfa með öðrum þjóðum og ræða við þær. Þetta geri Bandaríkin í þeirri von að geta orðið drottnarar á norðurslóðum.

Í grein eftir Carla Sands, sem birtist á vefmiðlinum Altinget í síðustu viku, varaði hún við „ögrandi framkomu“ Rússa og aukinni hernaðarvæðingu á heimskautasvæðinu. Rússar sjá málin frá annarri hlið og telja að með ásökunum Bandaríkjanna og einhliða ákvörðunum þeirra séu þau að grafa undan áratuga löngum friðsömu samskiptum á svæðinu.