COVID-19 faraldurinn er í niðursveiflu hér á landi.  Hins vegar er þessi niðursveifla ekki mjög hröð. Þetta sagði Þórólfur Guðnason, sóttvarnarlæknir, á upplýsingafundi almannavarnardeildar ríkislögreglustjóra rétt í þessu.

15 einstaklingar greindust með veiruna síðast liðinn sólarhring.  Átta á höfuðborgarsvæðinu, fimm á Vestfjörðum, einn á Suðurlandi og einn í Vestmannaeyjum.

Tveir eru á gjörgæslu á Landspítala og einn á Akureyri. Aðeins tveir eru í öndunarvél.

Eitt andlát varð á síðasta sólarhring og eru því alls níu látnir vegna veirunnar.

„Mat á faraldrinum er það að faraldurinn er í niðursveiflu en reynslan annars staðar frá segir að það gerist ekki mjög hratt. Við verðum áfram að vera vakandi fyrir því að greina hér tilfelli og jafnvel að hér geti komið upp litlar hópsýkingar,“ segir Þórólfur og brýnir landsmenn til að ganga ekki of hratt um gleðinnar dyr í þessum efnum. Tilslakanir vegna takmarkanna hafa ekki tekið gildi og geri það ekki fyrr en 4. maí. Þar til þarf enn að fylgja núgildandi reglum.

„Að lokum vil ég hvetja einstaklinga að halda áfram þeirri samstöðu sem skilaði þessum góða árangri hér og fara eftir þeim tilmælum sem hafa verið gefin út og verða gefin út núna á næstu misserum, vikum og mánuðum.“