Sveinbjörn Gizurarson, prófessor í lyfjafræði, segir að ósennilegt sé að hægt verði að opna landið fyrir ferðum til og frá því fyrr en hægt verður að bólusetja fólk gegn kórónuveirunni. Það verði þó hægt ef hjarðónæmi myndast hér á landi en til þess þurfa nægilega margir að smitast af veirunni.

Morgunblaðið skýrir frá þessu í dag. Haft er eftir Sveinbirni að hugsanlega verði óskað eftir því að fólk sýni fram á að það sé með mótefni við veirunni áður en það ferðast á milli landa.

Blaðið segir að ríkisstjórnin hyggist kynna tillögur Þórólfs Guðnasonar sóttvarnalæknis, um hvaða skref eigi að taka til að aflétta aðgerðum vegna COVID-19 faraldursins, í dag. Á upplýsingafundi Almannavarna í gær sagði Þórólfur að hann telji að um langhlaup sé að ræða og það þurfi að fara hægt í að aflétta takmörkunum.

Þá hefur Morgunblaðið eftir Magnúsi Karli Magnússyni, prófessor í lyfja- og eiturefnafræði við læknadeild Háskóla Íslands, að rúmlega 400 klínískar rannsóknarmeðferðir séu nú í gangi um allan heim og því sé mikið að gerast varðandi COVID-19. Á móti séu það tæplega tíu lyf sem helst er horft til í baráttunni við veiruna.