Konan sem handtekin var í Bolungarvík í dag, grunuð um að hafa svindlað sig inn í bakvarðasveit Heilbrigðisstofnunar Vestfjarða með því að framvísa fölsuðum gögnum um menntun sem sjúkraliði, og fyrir að lyfjastuld, heitir Anna Aurora Waage Óskarsdóttir. Hún er fædd árið 1983.
DV hefur þetta eftir öruggum heimildum en ennfremur birti RÚV í kvöldfréttum mynd af Önnu Auroru sem hún hafði birt á Instagram. RÚV nafngreindi hana hins vegar ekki. Myndin sýnir Önnu Auroru í búningi hjúkrunarfræðings og segist hún vera að fara að „hjúkkast“. Hún hefur hins vegar ekki réttindi sem hjúkrunarfræðingur frekar en sjúkraliði.
Anna Aurora hefur verið virk í starfi Framsóknarflokksins og sat til skamms tíma í stjórn Framsóknarfélagsins í Mosfellsbæ, þar sem hún var búsett áður en hún flaug vestur til að taka þátt í störfum bakvarðasveitarinnar í Bolungarvík en þar fékk hún starf sem sjúkraliði á Hjúkrunarheimilinu í Bolungarvík.
Anna Aurora hefur verið mjög virk á samfélagsmiðlum og birt þar myndir og ummæli um störf sín í bakvarðasveitinni. Forsíðumynd hennar var skreytt slagorðinu „Við erum öll Almannavarnir“ en hún tók myndina út rétt eftir lögregluyfirheyrsluna fyrir vestan í dag, en Anna Aurora var látin laus úr haldi lögreglu eftir yfirheyrsluna.
Fyrir skömmu birti Anna Aurora bréf sem forseti Íslands sendi til bæjarstjóra Bolungarvíkur þar sem forsetinn lofar Bolvíkinga fyrir dugnað þeirra í baráttunni við kórónuveirufaraldurinn auk þess sem hann vísar til þess að maður lést af COVID-19 á Hjúkrunarheimilinu í Bolungavík.
DV reyndi ítrekað að ná sambandi við Önnu Auroru við vinnslu fréttarinnar en án árangurs.
