Donald Trump, Bandaríkjaforseti, hefur kallað þetta „kraftaverkakúr“ og heimilað notkun malaríulyfsins klórókíns í baráttunn gegn COVID-19. Frönsk yfirvöld hafa einnig heimilað notkun lyfsins. Vísindamenn víða um heim hafa bent á lyfið sem hugsanlega lækningu við kórónuveirunni skæðu. En margir sænskir læknar eru ekki eins sannfærðir og nú hafa mörg sænsk sjúkrahús hætt notkun lyfsins á COVID-19 sjúklinga.

Ástæðan er að sumir þeirra hafa fengið alvarlegar aukaverkanir. Expressen og Gautaborgarpósturinn skýra frá þessu.

„Við getum ekki útilokað að meðferðin valdi meira tjóni en hún kemur að gagni.“

Hefur Gautaborgarpósturinn eftir Magnus Gisslén, prófessor og yfirlækni, á sýkingadeild Sahlgrenska háskólasjúkrahússins.

Niðurstöður lítillar franskrar rannsóknar sýndu jákvæða virkni lyfsins gegn COVID-19 og því höfðu vaknað vonir um að það gæti komið að gagni gegn COVID-19. Donald Trump hefur til dæmis sagt lyfið „breyta stöðunni“. Af þessum sökum byrjuðu sænskir læknar að gefa sjúklingum lyfið þrátt fyrir að það hafi ekki verið samþykkt til notkunar gegn COVID-19.

„Við gerðum eins og allir aðrir og gáfum sjúklingum klórókín í upphafi. Það voru litlar rannsóknir sem sýndu að það virkaði gegn kórónuveiru og þetta er einnig lyf sem við þekkjum frá meðferðum gegn malaríu.“

Sagði Gisslén. En nú hefur honum snúist hugur og í síðustu viku var allri notkun lyfsins hætt á Sahlgrenska eftir að áhyggjur vöknuðu um að lyfið gæti valdið bráðum hjartavandamálum hjá COVID-19 sjúklingum.

„Það vöknuðu grunsemdir um alvarlegri aukaverkanir en við héldum í upphafi. Við getum ekki útilokað alvarlegar aukaverkanir, sérstaklega á hjartað, og lyfið er gefið í stórum skömmtum. Þess utan eru ekki sterkar sannanir fyrir að klórókín virki gegn COVID-19.“

Sagði Gisslén sem sagðist ekki gefa mikið fyrir fyrrgreinda franska rannsókn. Hún uppfylli ekki þær kröfur sem eru gerðar til rannsókna og því sé gildi hennar afskaplega takmarkað.

Carl Sydenhag, 40 ára, er einn þeirra sem fékk klórókín gegn COVID-19. Hann var lagður inn á Södersjúkrahúsið í Stokkhólmi með hita og átti erfitt með andardrátt. Honum voru gefin sýklalyf og klórókín. Í stað þess að batna, versnaði heilsa hans.

„Ég fékk krampa og höfuðverk, þann versta sem ég hef fengið. Það var eins og ég hefði gengið inn í háspennustöð.“

Sagði hann í samtali við Expressen. Sjónin fór einnig versnandi en það er þekkt aukaverkun af klórókíni.  Hann hefur nú náð sér en telur að sjónin hafi ekki enn náð fyrri styrk. Notkun klórókíns hefur verið hætt á sjúkrahúsinu.

En þannig er það ekki á öllum sænskum sjúkrahúsum. Á Karólínska háskólasjúkrahúsinu er lyfið enn gefið verst höldnu COVID-19 sjúklingunum en notkunin hefur minnkað mikið.