Í Panama hefur verið gripið til þess ráðs að leyfa konum að fara út úr húsi í tvær klukkustundir á mismunandi dögum. Karlar mega fara í stórmarkaði og apótek á þriðjudögum, fimmtudögum og laugardögum. Konurnar mega fara út á mánudögum, miðvikudögum og föstudögum. Enginn má fara út á sunnudögum. Þessar reglur munu gilda næstu 15 daga hið minnsta.
Í Austurríki er skylda að vera með munnbindi þegar farið er í verslanir. Fólk fær bindin við innganga í verslanir og verksmiðjur í landinu framleiða munnbindi í milljónatali þessa dagana. Í Slóvakíu, Tékklandi og Bosníu hefur einnig verið gripið til þess ráðs að skylda fólk til að nota munnbindi.
Í Serbíu ákváðu yfirvöld að hundaeigendur mættu bara viðra hunda sínum á milli klukkan 20 og 21. Nú hefur verið fallið frá þessu því margir hundaeigendur fóru ekki eftir þessu. Því er nú fjöldi hundaeigenda sem vita ekki nú hvernig þeir eiga að viðra hunda sína. Í Serbíu er algjört útgöngubann í gildi fyrir fólk eldra en 65 ára.
Svíar eru líklegast með mildustu aðgerðirnar af Norðurlöndunum en þar er miðað við að ekki megi fleiri en 50 koma saman. Skólar eru enn opnir sem og veitingastaðir og barir.
Á ákveðnum svæðum í Kólumbíu er það síðasta talan í kennitölu fólks sem segir til um hvenær það má vera á ferðinni. Í borginni Barrancabermeja mega íbúar með kennitölu sem endar á 0, 4 eða 7 til dæmis vera úti á mánudögum en þeir sem eru með 1, 5 eða 8 mega vera úti á þriðjudögum.
