Samkvæmt greiningu íslenska verðbréfafyrirtækisins Arev gæti það tekið allt að 10 ár að ná upp sama ferðamannafjölda hingað til lands og kom í fyrra.
Þar eru settar fram þrjár spár um hversu langa tíma það taki að ná upp sama fjölda ferðamanna og kom árið 2019. Svartsýna spáin gerir ráð fyrir 10 árum, bjartsýna spáin gerir ráð fyrir 4.5 árum og raunhæfa spáin gerir ráð fyrir að árið 2028 muni nást sami fjöldi hingað til lands og árið 2019, en þá komu um tvær milljónir ferðamanna til landsins.
Í raunhæfu spá fyrirtækisins um fjölda ferðamanna á þessu ári segir að hingað til lands muni koma um 1.3 til 1.4 milljónir ferðamanna, en svartsýnni spá fyrirtækisins segir að 1.1 milljón muni ferðast til Íslands og bjartsýna spáin segir 1.6 milljón ferðamanna koma hingað til lands í ár.
Þess skal getið að tölurnar eru byggðar á 12 mánaða meðaltali.
Jón Scheving Thorsteinsson, framkvæmdastjóri Arev, sagði við Eyjuna að ekki mætti gera of mikið úr svartsýnu spánum, þetta væri einungis sett fram til að hefja umræðuna einhverstaðar. Taldi hann að raunhæfa spáin gæfi nokkuð góða mynd af því sem koma skyldi, miðað við ástandið nú, en sagðist auðvitað vona til þess að til að bjartsýna spáin yrði sú rétta. En auðvitað gæti allt breyst með stuttum fyrirvara.
Jóhannes Þór Skúlason, framkvæmdastjóri Samtaka ferðaþjónustunnar, segir við Eyjuna að ómögulegt sé að dæma um slíkar spár þar sem forsendur breytist dag frá degi:
„Ég tel að það sé ekki tímabært að skoða svona sviðsmyndir núna, staðan breytist núna milli daga og jafnvel innan sama dags.“
Áhrif kórónaveirunnar á ferðamannastrauminn til Íslands eru veruleg. Líkt og áður hefur verið greint frá hefur starfsemi Icelandair raskast töluvert og er ráð gert fyrir að flugframboð félagsins muni skerðast að minnsta kosti um 30% á árinu vegna niðurfellinga ferða og ferðabanns Bandaríkjanna, Noregs og Danmerkur. Enn gæti bætt í, þar sem óvissa ríkir um hver viðbrögð annarra ríkja verði í kjölfarið.
Áður en kórónaveiran lét á sér kræla gerðu spár fyrir að árið 2020 kæmu álíka margir ferðamenn hingað til lands og í fyrra, en ljóst er að þær spár eru fyrir bí. Ljóst er að fækkunin, hver sem hún verður, mun hafa veruleg áhrif hér á landi og mörg ferðaþjónustufyrirtæki munu ekki lifa það af.
