Friðrik nokkur spurði meðlimi Facebook-hópsins Vesturbærinn hvort það sé ekki hægt að safna undirskriftum og hvetja Byko og Krónuna til að setja einhverjar hindranir eða loka bílastæðunum við Granda á kvöldin. „Þetta spól er algerlega glatað,“ sagði Friðrik og fékk miklar undirtektir frá öðrum meðlimum hópsins en 200 manns hafa líkað við færslu Friðriks.
„Best væri ef löggan myndi einhverntíma nenna að mæta og sekta duglega. Það myndi fæla þetta lið frá því að haga sér svona,“ segir Arnaldur nokkur en honum er þá sagt að það hafi verið gert í langan tíma. „Það stoppar þetta ekki.“
Þá segjast nokkrir hafa hringt í lögregluna vegna málsins. „Hringdi í lögguna,“ segir Katrín nokkur. „Hún ræður ekki við þetta en reynir. Búin að fara þrisvar í kvöld og ætlar aftur. Þetta eru 30 til 40 bílar sem að eru mættir en aðeins sumir, með 10 heilasellur fimm í hvoru eista (mín orð), fara af stað og spæna.“
Nokkrir meðlimir hópsins leggja til að grípa til afdrifaríkari aðgerða. „Þessi hávaði er að gera mann brjálaðann, verst að löggan gerir ekkert í þessu, er að hugsa um að safna saman öllum nagla og skrúfupökkum sem ég á og fara og dreifa þeim á bílastæðið þarna,“ segir Þórmar nokkur. „Nú væri gott að eiga handsprengju eða tvær,“ segir annar meðlimur hópsins.
Einar nokkur tekur þá upp á því að ögra fólkinu sem er að kvarta undan hávaðanum. „Langar að hóa í strákana og fara niður eftir allir á v8 bara til að vera pirrandi. Og lesa frá fullorðnu fólki að tala um að dreifa nöglunum og glerbrotum þarna er sturlað. Litlu frændur mínir myndu ekki detta þetta í hug svona skemmdarverk hvað þá fullorðnir búðingar,“ segir Einar.
