Kári Stefánsson, forstjóri Íslenskrar erfðagreiningar, hyggst ekki fara í framboð fyrir Sósíalistaflokk Íslands fyrir næstu Alþingiskosningar, líkt og orðrómur hefur verið uppi um undanfarið.
Þetta staðfestir Kári í svari við fyrirspurn Eyjunnar:
„Ég hef aldrei verið í stjórnmálaflokki og reikna ekki með því að enda í þannig drasli úr þessu,“
sagði Kári. Hann nefndi jafnframt að ekki hafi verið leitað til sín um framboð.
Kári segist heldur ekki á þeim buxum að setjast í helgan stein, en hann verður 71 árs í apríl:
„Ég hef margoft sagt við vini mína, ´im not gonna retire, im gonna die´. Mér finnst það ekki aðlaðandi hugmynd að hætta að vinna og meðan það er þörf fyrir mig, meðan menn vilja hafa mig í vinnu og svo lengi sem ég held starfsorku, þá mun ég halda áfram,“
sagði Kári við Eyjuna.
Gunnar Smári Egilsson, stofnandi Sósíalistaflokks Íslands staðfesti við Eyjuna að ekki hefði verið leitað til Kára um framboð, enda undirbúningurinn ekki kominn á það stig ennþá.
Aðspurður hvort Kári væri draumaframbjóðandi flokksins, sagðist Gunnar ekki svo viss:
„Veit ekki, síðast buðum við fram lista hinna kúguðu, hann er ekki beint í þeim hópi,“
sagði Gunnar, en Kári er gjarnan ofarlega á lista þegar kemur að launahæstu forstjórum landsins.
Kári hefur látið mikið að sér kveða á ritvellinum og í fjölmiðlum að undanförnu um samfélagsmál. Hann sagði í viðtali á Sprengisandi árið 2015 að hann hefði alla tíð verið sósíalisti, þó svo að hugtakið væri orðið útþynnt á vorum tímum:
„Ég veit ekki hvað það þýðir lengur. Ég tel að verðmætasköpun eigi að vera í höndum einkaaðila, ríkið á ekki að vera í miklum rekstri. Ríkið á þó að sjá um margt, meðal annars heilbrigðiskerfið, almenningssamgöngur og fleira,“
sagði Kári þá.
Hann hefur verið gagnrýninn á rekstur heilbrigðiskerfisins og safnaði tæplega 87 þúsund undirskriftum árið 2016 sem hann afhenti þáverandi forsætisráðherra til að krefjast þess að Alþingi skyldi verja 11% vergrar landsframleiðslu í heilbrigðismál, en hlutfallið er 8.3% núna.
Þá er hann andvígur hverskyns hugmyndum hægri manna um að auka aðgengi almennings að áfengi, hvar hann og Gunnar Smári eru einnig skoðanabræður, en Gunnar Smári er fyrrverandi formaður SÁÁ.
Þá styrkti Kári sósíalistaflokkinn um 250 þúsund krónur árið 2018.
Sósíalistaflokkur Íslands samþykkti í janúar að fela kjörstjórn flokksins að skipa kosningastjórn hið fyrsta til að undirbúa framboð flokksins til næstu Alþingiskosninga.
Gunnar Smári hefur sjálfur ekki útilokað að gefa kost á sér, en segir að enn sé allt of snemmt að spá í framboðslistum, verið sé að byggja upp innra starf flokksins og enn sé langt í slíkar vangaveltur.
Sósíalistaflokkur Íslands var stofnaður þann 1. maí 2017. Flokkurinn bauð ekki fram í Alþingiskosningum það ár, en náði inn einum fulltrúa í sveitarstjórnarkosningunum árið 2018, Sönnu Magdalenu Mörtudóttur en flokkurinn fékk þar 6.4% atkvæða, eða 3.758 atkvæði.
Til samanburðar má nefna að Vinstri grænir fengu aðeins 4.6% atkvæða, eða alls 2.700 atkvæði, sem dugði fyrir einum fulltrúa, Líf Magneudóttur, sem hélst áfram í meirihlutasamstarfi við Samfylkingu og Pírata, auk viðbótar frá Viðreisn.
Sósíalistaflokkurinn hefur fengið nokkurn byr í könnunum undanfarið og mælst reglulega yfir 5% markinu.
