Skífuþeytingar, þrif, letidagur og mastersritgerð framundan
„Ég man ekki eftir neinum sérstökum plönum þessa helgi en ég hitti vinkonur mínar oft í kaffi eða drykk seinnipart föstudags, ekki síst þegar er pabbahelgi/vika.
Í kvöld, (föstudaginn 1. september) ætla ég reyndar að spila mitt mánaðarlega gigg á kaffi Vínyl sem dj Álfbeat og mun því líklega nýta seinnipartinn til að undirbúa mig fyrir það.
Ég spila frá klukkan átta til ellefu, sem er mjög passlegt fyrir 45 ára heimspekikennara sem vill helst ekki fara of seint að sofa. Ég spila annars seiðandi og taktfasta elektróníska tóna af ýmsum gerðum frá ýmsum tímabilum.
Laugardeginum verður að mestu eytt í hvíld og slökun. Ég þarf alltaf að passa að hvíla mig vel um helgar svo að ég hafi orku í kennsluvikuna. Mun líklega vera í náttfötunum allan daginn, horfa á eitthvað skemmtilegt, kela við unnustann og í mesta lagi labba yfir götuna í sundlaug Vesturbæjar. Líklega munum við svo elda okkur eitthvað gott saman um kvöldið.
Sunnudagurinn fer svo í þrif og undirbúning kennslunnar framundan. Líklegast mun ég svo vinna í mastersritgerðinni minni sem fjallar um mikilvægi siðfræðilegrar umræðu fyrir fagmennsku kennara.
Við þurfum nefnilega ánægða kennara svo þeir geti betur stuðlað að því að börnin okkar blómstri!“
