Það kom mörgum á óvart þegar Gunnar Gylfason var rekinn frá Knattspyrnusambandi Íslands fyrir helgi, starfsmönnum KSÍ var tilkynnt um þetta á starfsmannafundi og kom uppsögn Gunnars mörgum í opna skjöldu. Enda Gunnar lengi verið starfsmaður sambandsins, Gunnar var sagður traustur samstarfsmaður og var í stóru hlutverki innan sambandsins.

,,Ástæðan fyrir uppsögn Gunnars er skipulagsbreyting, við erum alltaf að endurskoða hvernig við getum höndlað okkar mál,“ sagði Klara Bjartmarz, framkvæmdarstjóri KSÍ í samtali við 433.is í dag.

Gunnar hefur gengið í ýmis störf innan KSÍ, hann var fjölmiðlafulltrúi en hefur síðustu ár starfað í kringum landsliðsmál og Evrópumót félagsliða. Gunnar hefur spilað stórt hlutverk í því að velja dvalarstaði fyrir íslenska landsliðið á stórmótum.

Gunnar hefur séð um að bóka flugferðir fyrir landsliðsmenn sem eru að koma í landsleiki og önnur verkefni sem tengjast ferðalögum fyrir öll landslið KSÍ. Þá var Gunnar lengi vel einn af okkar færustu aðstoðardómurum en lagði flaggið á hilluna.

Þegar var spurt um hvernig málum yrði háttað nú þegar kemur að ferðalögum landsliða sagði Klara. ,,Við erum alltaf að skoða ferðakostnað og þau mál, sumum verkefnum er kannski betur komið fyrir á öðrum stöðum,“ sagði Klara og átti þar við að KSÍ skoði að setja einhver verkefni í hendur annara aðila sem starfa ekki hjá KSÍ

Ekki verður ráðið í stöðu Gunnars, fyrst um sinn hið minnsta. ,,Það verður ekki ráðið til að byrja með, það er verið að fækka og endurskipuleggja. Við sjáum hvernig það gengur upp.“