Áttu sand af seðlum og þráirðu að flytja frá Íslandi? Þá gæti þessi tiltekna fasteign í Bel Air-hverfinu í Los Angeles hentað þér en hún er til sölu og kostar skildinginn.

Umrædd fasteign, sem nefnist The Cartwell Estate, kostar 350 milljónir Bandaríkjadala, eða 37,4 milljarða króna. Ekki er um neina smábyggingu að ræða því hún er 2.300 fermetrar í það heila. Þarna má meðal annars finna glæsilegan vínkjallara, tennisvöll, rúmlega tuttugu metra langa sundlaug og bílastæðahús sem rúmar 40 fólksbíla.

Chartwell-byggingin var reist árið 1933 og nýtur hún í dag þess heiðurs að vera dýrasta íbúðarbyggingin sem er til sölu í Bandaríkjunum.

Jerry Perenchio, fyrrverandi stjórnarformaður og forstjóri Univision, átti og bjó í byggingunni allt til dánardags í maímánuði síðastliðnum.

Hús í Bel Air-hverfinu í Bandaríkjunum kosta yfirleitt gríðarlega fjármuni. Í frétt Forbes er þess getið að annað hús, sem meðal annars skartar 40 sæta kvikmyndasal, sé til sölu fyrir 250 milljónir Bandaríkjadala. Þá er reiknað með því að hús, sem nú er í smíðum í hverfinu, fari á sölu síðar á þessu ári og má búast við því að ásett verð verði 500 milljónir Bandaríkjadala, 53 milljarðar króna.