Sylvía Erla gefur út fyrsta lagið á íslensku
Sylvía Erla Melsted hefur viljað skapa frá því að hún var barn og á morgun kemur nýtt lag hennar, Ægisíða í spilun í útvarpi og á Spotify. Hún er einnig að vinna að heimildarmynd um lesblindu og barnabók um það sama.
„Lagið fjallar um þetta móment sem við upplifum öll,“ segir Sylvía Erla. „Fyrstu ástina sem er pínu vandræðaleg, fyrsta deitið, fyrsta bílrúntinn, þetta móment þegar við erum með fiðrildin í maganum og bíðum eftir að hinn aðilinn taki fyrsta skrefið.“
Sylvía Erla, sem er 21 árs, hefur verið í tónlist frá því að hún var barn, en hún byrjaði fjögurra ára að spila á píanó í Susuki skólanum. „Tónlistin er númer eitt, tvö og þrjú hjá mér.“
„Í laginu Ægisíða syng ég á íslensku, sem er stórt skref fyrir mig, því ég hef alltaf sungið á ensku,“ segir Sylvía Erla. „Ég er með gott teymi með mér, Ásgeir úr Stop Wait Go gerði textann með mér, og Jón Bjarni gerir taktinn, en hann hefur meðal annars unnið með Aron Can. Við erum mjög spennt að sjá útkomuna. En vinnsla við myndband er að hefjast.“
En af hverju að kenna lagið við Ægisíðu? „Þessi gata er falleg og passar vel við lagið, það er líka gott að götuheiti sem nafn á laginu og Ægisíðan hentar mjög vel fyrir myndatökur tengdar laginu,“ segir Sylvía Erla, sem sjálf býr á Seltjarnarnesinu, en þekkir vel til Ægissíðunnar og mannlífsins og fegurðarinnar sem einkennir hana.
Í fyrra gaf Sylvía Erla út lagið Gone, sem fékk mikla spilun á Spotify. Í kjölfarið kom Sylvía Erla fram á hinum ýmsu tónlistarhátíðum, meðal annars Secret Solstice, Iceland Airvawes og Þjóðhátíð. Einnig kom hún fram í lokaþætti Ísland Got Talent.
Þegar Sylvía Erla var 17 ára fékk hún hugmynd að heimildarmynd um lesblindu. Vinna við myndina er nú hafin í samstarfi við Saga Film. „Ég er sjálf lesblind og er ótrúlega glöð með að heimildarmyndin sé að verða að veruleika.“
Heimildarmyndin er hugsuð fyrir alla aldurshópa. „Hún mun sýna það jákvæða við að hafa lesblindu og öll tækifærin sem hún hefur að bjóða.“ En Sylvíu Erlu fannst vanta eitthvað fyrir börnin sem væru yngri og er því einnig að vinna að barnabók.
Plata er ekki á leiðinni, en Sylvía Erla er með tvær hugmyndir að plötum í vinnslu. „Ég er af og til að vinna að þeim, en það er engin tímasetning komin á hvenær þær koma út.“
Lagið Ægisíða kemur í spilun á Spotify og á útvarpsstöðvum á morgun.
