Í Reykjavík búa nú tæplega 24.000 manns af erlendum uppruna. Samþykkt var á opnum morgunverðarfundi mannréttinda-, nýsköpunar- og lýðræðisráðs og fjölmenningarráðs Reykjavíkur í Iðnó á miðvikudag, að auka aðgengi fólks af erlendum uppruna að upplýsingum á vef Reykjavíkurborgar og í umsóknarkerfum borgarinnar.
Einnig á að ráða starfsmann í þýðingar og upplýsingastjórnun á efni á öðrum tungumálum en íslensku. Þá voru einnig samþykktar tillögur um um tilraunaverkefni um rafræna upplýsingaveitu og um aðgerðir til að draga úr óútskýrðum launamuni byggðum á uppruna.
Aðstæður fólks af erlendum uppruna og tækifæri þeirra til þátttöku í samfélaginu voru ræddar á fundinum sem og leiðir til þess að koma betur til móts við þennan hóp, stöðu þeirra á atvinnumarkaði og aðgang þeirra að upplýsingum.
Á fundinum var meðal annars haldin kynning á nýlegri rannsókn um jafnrétti innflytjenda á atvinnumarkaði sem gerð var af héraðsdómslögmönnunum Claudie Ashonie Wilson og Auði Tinnu Aðalbjarnardóttur. Helstu niðurstöður skýrslunnar eru þær að margskonar hindranir standi í vegi menntaðra innflytjenda að vinnu hjá hinu opinbera.
Þar á meðal sé ófullnægjandi íslenskukunnátta, sem vegi þungt, en samt sem áður megi rekja margar hindranir til óhagstæðra laga og stefnu stjórnvalda, sem og framkvæmdar. Samþykkt var sameiginleg bókun ráðanna um að unnið verði úr niðurstöðum rannsóknarinnar til að koma í veg fyrir mismunun og fjölga tækifærum innflytjenda hjá Reykjavíkurborg sem atvinnuveitanda.
Joanna Marcinkowska, sérfræðingur í málefnum innflytjenda á mannréttinda- og lýðræðisskrifstofu, flutti erindi undir nafninu Upplýsingagjöf og samskipti í nútíma samfélagi. Hún fór yfir íslenskt lagaumhverfi og stefnumótun Reykjavíkurborgar í upplýsingagjöf. Hún sagði nauðsynlegt að veita fólki af erlendum uppruna aðgang að réttum upplýsingum á réttum tíma. Með því að veita upplýsingar sé hægt að hafa áhrif á öryggi borgarbúa og um leið valdefla fólk og hvetja til virkari þátttöku í borgarsamfélaginu.
