Nágrannar Kristjáns Gunnars Valdimarssonar, fyrrverandi skrifstofustjóra eftirlitsskrifstofu skattstjórans í Reykjavík og lektors við Háskóla Íslands, kvarta sáran undan miklu partístandi við heimili lögfræðingsins í vesturbæ Reykjavíkur. Samkvæmt áreiðanlegum heimildum DV hefur Kristján Gunnar, sem síðast var í fréttum fyrir að hafa verið í samskiptum við lögmannstofuna Mossack Fonseca á Panama og haft milligöngu um uppsetningu eftirlaunasjóðs þar fyrir fyrrverandi borgarfulltrúa Sjálfstæðisflokksins, Júlíus Vífil Ingvarsson, haldið partí fyrir unglinga á heimili sínu. Einn af nágrönnum Kristjáns Gunnars kallar hann „nágrannann frá helvíti.“

Samkvæmt áreiðanlegum heimildum mun Kristján Gunnar hafa haldið umrædd partí og boðið þar unglingsstúlkum fíkniefni á borð við kókaín í skiptum fyrir kynlíf. Ein stúlka, sem DV ræddi við, segist hafa hitt Kristján Gunnar á sautján ára afmæli hennar. Að hennar sögn bauð Kristján Gunnar henni kókaín og gekk síðan á hana um kynlíf í skiptum fyrir fíkniefnin. Stúlkan segist hafa hafnað umleitan hans og flúið af heimili hans með leigubíl.

Ung stúlka flutt með sjúkrabíl frá heimili hans

Ekki er langt síðan lögreglan var kölluð að heimili Kristjáns Gunnars vegna ungrar stúlku sem hafði tekið of mikið af fíkniefnum og var í lífshættu. Ekki er vitað hvort Kristján Gunnar hafi verið færður á lögreglustöð við það tilefni. Partíið hélt samt áfram á heimili hans. Ekki er vitað um líðan stúlkunnar. Hún er samt sem áður ekki sú eina sem hefur verið flutt með sjúkrabifreið frá heimili Kristjáns Gunnars. Útköllin eru fjölmörg, vegna allt frá ofskömmtun lyfja til lífshættulegra krampa og einstaklinga í andnauð.

Þá eru útköllin misalvarleg en í ágúst var lögreglan til að mynda í tvígang kölluð að heimili hans en þá hafði eitt af partíum lögfræðingsins farið úr böndunum. Þá var Kristján Gunnar rændur og frelsissviptur af einum gesta partísins og af honum tekinn sími, fíkniefni og fjármunir. Lögreglan á höfuðborgarsvæðinu handtók einn mann grunaðan um verknaðinn en sá var færður samdægurs til afplánunar vegna útistandandi dóma.

Á sama tíma bjuggu tvær vændiskonur frá Suður-Ameríku á efstu hæð heimilis hans en samkvæmt heimildum DV hafði Kristján Gunnar flogið þeim til landsins og voru þær honum innan handar ef hann þurfti á þjónustu þeirra að halda. Þegar lögreglan kom að heimili hans daginn eftir umrædda frelsissviptingu, vegna þess að talið var að Kristján Gunnar hefði verið frelssissviptur aftur, þá voru teknar niður kennitölur og nöfn þeirra sem voru gestkomandi, en vændiskonurnar voru látnar afskiptalausar.

Vændiskonurnar voru vinkonur hans

DV ræddi við Kristján Gunnar sem þverneitaði fyrir það að hafa keypt fíkniefni, notað þau eða boðið ungum stúlkum slík efni í skiptum fyrir kynlíf. Þá segir hann það algjöran uppspuna að ung stúlka hafi þurft að flýja af heimili hans með leigubifreið. Samkvæmt áreiðanlegum heimildum DV var það þó raunin.

„Þetta er mesta rugl sem ég hef heyrt.“

Hvað hinar meintu vændiskonur varðar þá sagði Kristján Gunnar að þær væru vinkonur sínar sem hefðu verið í heimsókn hér á landi.

Samkvæmt okkar heimildum þá varstu einnig frelsissviptur og rændur í ágúst, er það rétt?

„Ég ætla ekki að tjá mig neitt um það.“

En tvær konur sem gistu á efri hæð hússins þíns frá Suður-Ameríku, kannast þú við þær tvær?

„Mína gesti? Auðvitað kannast ég við mína gesti. Hvers konar eiginlega fíflagangur er þetta?“

Þetta voru semsagt vinkonur þínar frá Suður-Ameríku?

„Jájá.“

Samkvæmt okkar heimildum voru þetta vændiskonur, er eitthvað til í því?

„Nei“

Þetta voru bara vinkonur þínar frá Suður-Ameríku?

„Já.“

Hvaðan voru þær í Suður-Ameríku?

„Þetta eru bara vinkonur mínar sem ég bauð hingað.“

Man ekki eftir samskiptum við stúlkur undir lögaldri

Hvað tíðar ferðir lögreglu og sjúkrabifreiða að heimili hans varðar sagði Kristján Gunnar í byrjun samtalsins við DV að það hefði verið vegna ungs fólks sem hann hefði leigt neðstu hæð hússins til. Annað hljóð kom þó í Kristján Gunnar eftir því sem leið á samtalið.

„Ég skil ekki“

Hefur þú verið í samskiptum við ungar stúlkur undir lögaldri í gegnum Facebook?

„Ég nenni ekki og vill ekki vera tjá mig um svona vitleysisgang. Ég er ekki skyldugur til þess að svara einhverjum rugluðum blaðamanni.“

Er það þá líka lygi að þú hafir verið í samskiptum við stúlkur undir lögaldri á Facebook?

„Já, ég man ekki eftir því.“

Þú manst hvort þú sért að tala við stelpur undir lögaldri á Facebook, eða ekki?

„Nei.“

Engar?

„Nei.“

Varstu viðstaddur einhverja af þessum lögregluheimsóknum á heimili þitt?

„Já.“

Hversu oft varstu staddur á heimili þínu þegar lögregla og sjúkralið mætti á heimili þitt?

„Ég man það nú ekki.“

Var það oftar en þrisvar?

„Ég ætla ekkert að vera að tjá mig um það sko. Ef það var eitthvað að fólki og það var hringt á sjúkrabíl þá náttúrulega er það þannig sko.“

Það var enginn að handleggsbrotna. Fólk var að fara í sjúkrabíl af heimili þínu vegna þess að það tók of mikið af eiturlyfjum?

„Já, ég var að segja þér það því ég leigði herbergi hérna niðri og það var svolítið rugl í gangi þar og ég fylgdist ekki með því.“

Lögreglan kom aldrei út af einhverri ástæðu sem átti sér stað inni á þínu heimili, ekki í kjallaranum? Lögreglan ræddi aldrei við þig?

„Lögreglan ræddi við mig sko…“

Fyrirgefðu, lögreglan?

„Hvað segiru?“

Ég spurði hvort að lögreglan hafi rætt einhverntímann við þig á þínu eigin heimili vegna mála sem komu upp á þínu heimili en ekki kjallaraíbúðinni?

„Já bíddu, hver er spurningin?“

Ég er að spyrja hvort að þú munir eftir einhverjum atvikum þar sem lögreglan kom inn á þitt heimili vegna einhverra mála sem áttu sér stað?

„Jájá ég ætla ekkert að tjá mig um þetta. Þetta er bara tóm vitleysa. Ég skil ekki hvaðan þú hefur þessar…“

Endilega þá leiðréttu mig. Kom lögreglan aldrei inn á heimilið þitt?

„Ég ætla ekkert að tjá mig um þetta. Þér kemur það bara ekkert við sko.“

Af hverju er það þá vitleysa ef þú getur ekki sagt mér það?

„Ég þarf ekkert að tala um þetta við þig sko. “

Ekkert frekar en þú vilt, það er ekkert vandamál. Ég er bara að spyrja afhverju ætti lögreglan að vera að koma heim til þín ef það er bara einhver vitleysa?

„Nei það er vitleysa sem þú ert að gera hérna, að spyrja mig svona.“

Ég er bara að spyrja þig hvort þú munir eftir atvikum, ég er að fá þína hlið á sögunni, og ég vil bara fá að heyra þitt, af hverju lögreglan og sjúkralið er að koma svona rosalega oft á heimilið þitt?

„Þetta var ekkert rosalega oft. Þetta kom fyrir eins og ég nefndi við þig.“

Hversu oft komu sjúkrabílar á heimilið þitt til þess að sækja einstaklinga á þínu heimili?

„Ég get ekki sagt það sko, ég get ekki sagt það sko.“

Oftar en tvisvar?

„Njaa, þetta voru fá skipti. En það kom fyrir.“

Það kom fyrir að það væri verið að sækja fólk vegna ofneyslu lyfja á heimilið þitt?

„Já, vegna þess að fólk taldi að það þyrfti á aðstoð að halda en það var ekki út af mér sko. Ég fór aldrei í sjúkrabíl sko.“

En það var fólk samt inni á þínu heimili sem þurfti á sjúkrabíl að halda vegna þess að það var í partí á þínu heimili?

„Átti að sleppa því að hringja í sjúkrabíl ef fólk óskaði eftir sjúkrabíl?

Nei, alls ekki.

„Þú ert að ýja að því.“

Nei ég er alls ekkert að ýja að því. Ég er að reyna að spyrja þig hvort þetta hafi átt sér stað, því þú varst að reyna að tengja þetta við kjallarann, og ég var að spyrja hvort þetta hafi ekki átt sér stað inni á þínu heimili?

„Jájá. Ég skil þig.“

Var það oftar en tvisvar eða fjórum sinnum sem að það þurfti að kalla til sjúkrabíl vegna gesta sem voru á þínu heimili?

„Ég man það nú ekki, það var í einhver skipti.“

Hringdi í „ákveðna aðila“ til að hreinsa út

Þá sagðist Kristján Gunnar ekki geta svarað fyrir það fólk sem þurfti á sjúkrabíl að halda vegna veikinda. Hann sagðist geta verið sekur um það að hafa boðið fólki í partí en þverneitar fyrir það að hafa haft samband við gesti sína, þar á meðal ungar stúlkur, í gegnum Facebook.

Kristján Gunnar viðurkennir þó að hafa verið frelsissviptur. Hann hafi þá verið beittur miklu ofbeldi og honum hótað gróflega. Hann sagðist ekki hafa þekkt mennina en samkvæmt heimildum DV var aðeins einn sem stóð að frelsissviptingunni og var hann gestkomandi á heimilinu.

„Það voru teknir af mér peningar. Það er bara þannig. Með miklu ofbeldi.“

Aðspurður um þá gesti sem voru í partíunum á heimili hans í vesturbæ Reykjavíkur þá segir hann að „skríll“ hafi ruðst inn til hans. Kristján Gunnar hafi þá hringt í „ákveðna aðila“ til þess að hreinsa hérna út.

„Þetta var ófremdarástand sem var síðan bara lokað fyrir. Hér ruddist fólk inn.“

Kristján Gunnar telur að umræddur fréttaflutningur sé til þess að ná höggi á hann en segist þó ekki vita ástæðurnar sem liggja þar að baki að „menn“ séu að reyna það.

Samkvæmt heimildum DV innan úr herbúðum viðbragðsaðila, lögreglu og sjúkraliðs, ríkir „ástand“ á heimili Kristjáns Gunnars. Ástand sem ríkt hefur frá því um mitt sumar og ríkir enn.

Kristján Gunnar er vel þekktur innan fjármálageirans hér á landi en hann var til að mynda skattráðgjafi Landsbankans fyrir hrun og var forstöðumaður þeirrar deildar bankans. Þá reyndi Kristján Gunnar árið 2013 að fá umboð til þess að opna útibú fyrir Mossack Fonseca á Íslandi en sú lögmannstofa er alræmd og lék lykilhlutverk í stofnun aflandsfélaga á Panama.

Nú síðast var Kristján Gunnar kynntur sem einn af eigendum Cato lögmanna á Íslandi. Hann hefur þó af einhverjum ástæðum verið fjarlægður af vefsíðu lögmannstofunnar. Á heimasíðu Háskóla Íslands er hann skráður lektor lagadeildar. Þá vann hann einnig sem lögfræðingur hjá Umboðsmanni Alþingis um skamma hríð fyrir margt löngu. Þá vann hann hjá Fjármálaráðuneytinu og gegndi stöðu forstöðumanns skattasviðs Búnaðarbanka Íslands.