„Lögreglan á höfuðborgarsvæðinu minnir afgreiðslufólk á að vera sífellt á varðbergi þegar peningaseðlar eru annars vegar, en þetta er rifjað upp hér vegna nokkurra fjársvikamála sem eru nú til rannsóknar hjá embættinu,“ segir í tilkynningu frá lögreglunni á höfuðborgarsvæðinu.

Þar kemur fram að um sé að ræða tilvik þar sem greitt var fyrir vörur með 50 evrum. „En ekki var um raunverulega seðla að ræða og allt eins líklegt að þeir séu úr borðspili eða viðlíka. Á meðfylgjandi mynd má sjá þrjá seðla úr fjársvikamálunum og einn fullgildan 50 evruseðil, en munurinn á þeim er mjög greinilegur,“ segir lögreglan en bætir því við að í amstri dagsins gerist hins vegar mistök. Því sé afgreiðslufólk minnt á að sýna aðgæslu í störfum sínum.