Eyþór Arnalds, oddviti Sjálfstæðisflokksins í Reykjavík, hefur lengi átt í útistöðum við Dóru Björt Guðjónsdóttur, borgarfulltrúa Pírata, ekki síst vegna deilna þeirra um hlut Eyþórs í Árvakri og hvernig kaupin á honum voru fjármögnuð af Samherja, sem Dóra Björt hefur sagt lykta af spillingu og gefið í skyn að Eyþór sé í vasanum á Samherja og hafi verið margsaga um málið í skýringum sínum. Skrifaði hún grein sem heitir Miskunnsami Samherjinn, þar sem hún lýsti Sjálfstæðisflokknum sem flokki „sérhagsmuna, spillingar og yfirgengilegrar græðgi.“
Eyþór þylur upp í aðsendri grein á Mannlífi, ýmis mál sem eiga að bera vitni um hræsni Dóru Bjartar þegar talið berst að spillingu eða verið sé að afvegaleiða umræðuna:
„Sumir pólitíkusar freistast til að tala um eitthvað allt annað þegar málefnastaðan er veik. Í þrígang hefur Dóra Björt Guðjónsdóttir, oddviti Pírata, komið sér undan því að ræða um þetta umdeilda deiliskipulag í Elliðaárdal við mig í útvarpi. Í stað þess hefur hún einbeitt sér að ræða um eignarhlut minn í Árvakri,“
segir Eyþór.
Hann nefnir einnig að Píratar eigi erfitt með að venjast því að þeir séu í meirihluta og hafi völd:
„Bragginn var byggður á þeirra vakt. Píratar neituðu þeirri staðreynd að tölvupóstum hafði verið eytt. Þeir bera fulla ábyrgð á því að byggja atvinnuhúsnæði á þúsundir fermetra í sjálfum Elliðaárdalnum. Og Píratar hafa fellt tillögur um að íbúarnir fái að kjósa um málið.“
Eyþór segir Dóru Björt ekki sjá neitt athugavert við að Reykjavíkurborg hafi brotið á starfsmönnum, líkt og héraðsdómur hafi komist að niðurstöðu um á síðasta ári og þylur upp mörg mál sem líta ansi illa út fyrir meirihlutann:
„Pírötum finnst kannski ekkert að því að borgin hafi brotið jafnréttislög með ráðningu borgarlögmanns eins og Jafnréttisstofa úrskurðaði um. Borgin sjálf snuðaði öryrkja á vakt Pírata og var dæmd í Hæstarétti fyrir það atferli. Endurgreiðslur til öryrkja töfðust um árabil eftir dóminn og lentu öryrkjar í sérkennilegum fjármagnstekjuskatti vegna dráttarins. Oddvita Pírata finnst væntanlega ekkert að því að borgin sinni ekki skyldum sínum gagnvart heimilislausu fólki eins og Umboðsmaður Alþingis komst að í áliti sínu. Píratar bera líka ábyrgð á dótturfélögum borgarinnar síðustu fimm árin en Orkuveitan var uppvís að því að oftaka vatnsgjöld af íbúum samkvæmt úrskurði samgöngu- og sveitastjórnarráðuneytisins. Sorpa gleymdi kostnaði upp á 1600 milljónir og Félagsbússtaðir eyddu hundruðum milljóna án heimilda. Í staðinn fyrir að sinna skyldum sínum gagnvart borgarbúum og laga það sem er í ólagi (og það er ófátt), fer Dóra Björt í manninn.“
Að lokum segir Eyþór að Dóra Björt þurfi kannski að líta í eigin barm áður en hún gagnrýni aðra:
„Það er ágætt í aðdraganda jólanna að Dóra rifji upp biblíusöguna um miskunnsama samverjann. Í beinu framhaldi er eðlilegt að rifja upp söguna af flísinni og bjálkanum. „Hví sérð þú flísina í auga bróður þíns en tekur ekki eftir bjálkanum í auga þínu? Hvernig færð þú sagt við bróður þinn: Bróðir, lát mig draga flísina úr auga þér, en sérð ekki bjálkann í þínu auga? Hræsnari, drag fyrst bjálkann úr auga þér og þá sérðu glöggt til að draga flísina úr auga bróður þíns.“
Sjá einnig: Eyþór – „Það er enginn með mig í vasanum”
Sjá nánar: Borgarstjóri bölvar Mogganum og segir Eyþór tvísaga:„Stendur Eyþór ennþá í skuld við Samherja ?“
Sjá einnig: Sjáðu hvernig mútufélag Samherja tengist Eyþóri Arnalds – „Ég er engum háður“
Sjá einnig: Dóra Björt sakar Eyþór um blákaldar lygar – „Átt að skammast þín fyrir að koma svona fram“
