Fyrirsætan og leik- og söngkonan Halla Koppel, sem Íslendingar þekkja eflaust betur undir föðurnafninu Vilhjálmsdóttir, á von á sínu þriðja barni með eiginmanni sínum, Harry Koppel. Halla og Harry eiga von á stúlku í þetta sinn en fyrir eiga þau Louisu, fædda í september 2015, og Harry Þór, fæddan í júní árið 2017.

Fjölskyldan er búsett á Englandi en Halla og Harry gengu í það heilaga árið 2014. Harry er kólumbískur en alinn að miklu leyti upp í Bretlandi og er því bæði ensku- og spænskumælandi. Börnin eru því fullfær í ýmsum tungumálum en Halla passar að tala ávallt íslensku við þau. Halla nýtur sín í móðurhlutverkinu eins og skein í gegn í viðtali við Vísi árið 2017. Í því viðtali sagðist hún taka uppeldishlutverkið alvarlega.

„Ég vil bara að þau séu sterk, góð og fyndin. Þau eru bæði mjög viljasterk og kraftmikil svo það er mikilvægt að stýra því í rétta átt, en ég vil kenna þeim að vera sjálfsöruggir og skemmtilegir einstaklingar sem láta gott af sér leiða. Það skiptir mig máli að vera sterk kvenfyrirmynd og sýna þeim að mamma og pabbi séu að mörgu leyti sama hlutverkið, við fylgjum bæði okkar draumum, erum bæði fyrirvinna og önnumst börnin eins jafnt og færi gefst á,“ sagði Halla.