Það er stundum sagt að einhver hafi verið svo lánsamur að hrasa um eitthvað en það er þó yfirleitt ekki meint í bókstaflegri merkingu. En þegar níu ára drengur hrasaði í nóvember á síðasta ári var það svo sannarlega mikið lán. Að minnsta kosti gleymist drengurinn ekki og hefur tryggt sér pláss í sögubókum framtíðarinnar.
Í frétt NYTimes af málinu kemur fram að drengurinn, Jude Sparks, hafi verið í gönguferð með fjölskyldu sinni í útjaðri bæjarins Las Cruces í Nýju Mexíkó í Bandaríkjunum. Skyndilega ákvað Jude að fela sig fyrir bræðrum sínum en þá hnaut hann um eitthvað sem stóð upp úr jörðinni.
Í fyrstu hélt hann að um steingert tré væri að ræða en yngri bróðir hans taldi að um kjálka úr kú væri að ræða. Foreldrunum fannst hluturinn hins vegar líkjast fíl og þau tóku myndir af honum til að þau gætu leyst málið síðar.
“Lögun hlutarins var undarleg. Ég vissi bara að þetta var eitthvað sem maður finnur ekki víða.“
Sagði Jude í samtali við NYTimes.
Fjölskyldan leitaði á netinu en tókst ekki að finna neitt sem passaði við það sem Jude hafði hrasað um. Þau sendu því að lokum tölvupóst til Peter Houde, sem er líffræðiprófessor við New Mexico ríkisháskólann. Hann sá strax hvað Jude hafði hrasað um, horn og hauskúpu af Stegomastodon en það dýr var uppi fyrir um 1,2 milljónum ára og lifði aðallega í Norður-Ameríku. Dýrið líkist fílum nútímans og var með langar vígtennur.
Houde segir að þetta sé mjög óvenjulegur fundur og Sparks fjölskyldan eigi svo sannarlega hrós skilið fyrir að hafa tilkynnt um þetta í stað þess að fara sjálf að grafa hauskúpuna upp því það hefði getað eyðilagt hana.