Ítalska leikkonan Gina Lollobrigida fagnaði níræðis afmæli sínu á dögunum og borgarstjórn Rómar hélt veislu henni til heiðurs með risastórri afmælisköku og alls kyns fíneríi. Leikkonan veitti viðtal í tilefni stórafmælisins. Þar var hún spurð um meinta togstreitu milli hennar og Sophiu Loren. Hún svaraði því með orðunum: „Ég var ekki að keppa við neinn. Ég var númer eitt“ og bætti við: „Ég náði árangri á eigin forsendum, án aðstoðar framleiðenda. Ég gerði allt upp á eigin spýtur.“ Þarna skaut hún föstum skotum að Sophiu Loren og framleiðandanum Carlo Ponti sem gerði Loren að stórstjörnu og kvæntist henni.
Í viðtalinu ræddi Lollobrigida um fund sinn á árum áður með Fidel Castro en þá tók hún einkaviðtal við hann. Hún segist hafa hrifist af Castro sem manneskju, þótt ekki hafi hún verið sammála stjórnmálaskoðunum hans.
Lollobrigida náði ekki einungis frama sem leikkona heldur þótti hún afar fær ljósmyndari og sinnti einnig höggmyndalist. Hún lék síðast í kvikmynd árið 1997
