Um klukkan hálf fjögur í nótt bárust boð frá neyðarsendi til stjórnstöðvar Landhelgisgæslunnar. Sendirinn var þá djúpt suðvestur af landinu, skammt utan við íslenska lögsögu. Nánari eftirgrennslan leiddi í ljos að sendirinn tilheyrir bandrískri skútu. Kveikt var handvirkt á sendinum og því full ástæða til að telja að alvara sé á ferð.
Þetta kemur fram í tilkynningu frá Landhelgisgæslunni. Þar segir að rannsóknarskipið Árni Friðriksson hafi verið í þrjátíu sjómílna fjarlægð frá staðsetningu sendisins og hafi því verið óskað eftir að skipið færi þegar í stað á vettvang. Búist er við að Árni Friðriksson verði kominn á vettvang innan skamms.
Skipstjórnarmenn um borð í Árna Friðrikssyni segja að þungur sjór sé á svæðinu en ágætt skyggni. Varðskipið Þór er einnig á leið á vettvang en það var statt suður af landi þegar boðin bárust. Þór á þó eftir töluvert langa siglingu á vettvang.
Uppfært klukkan 8:52
Árni Friðriksson á nú skammt eftir að staðsetningu neyðarsendisins og sér áhöfn skipsins nú merki í ratsjá sem líkur eru á að séu frá bandarískri skútu sem neyðarsendirinn tilheyrir. Flugvél frá Isavia hefur verið kölluð út en hún er búin nákvæmum miðunarbúnaði. Hún fer væntanlega í loftið innan skamms og verður væntanlega komin á vettvang um klukkutíma eftir flugtak.
Einnig hefur Challenger eftirlitsflugvél frá danska flughernum verið kölluð út frá Syðri-Straumsfirði á Grænlandi. Hún verður væntanlega komin á vettvang um klukkan 11.