Bjarni Benediktsson, fjármálaráðherra, ávarpar íslensku þjóðina á Facebook í dag vegna Samherjamálsins. Segir hann allt hafa sinn farveg og að nauðsynlegt sé að leyfa þar til bærum stofnunum að höndla málin og fara beri eftir lögum og reglum.
Einmitt þess vegna sé Ísland eitt þeirra landa sem minnst spilling mælist:
„Við erum stolt af landinu okkar. Við viljum vera í fremstu röð. Við erum framsækin, metnaðarfull og bjartsýn þjóð. Við viljum, þrátt fyrir að vera smá í alþjóðlegu samhengi, skipa okkur á bekk með þeim sem standa fremst á alla mælikvarða mannlífsins og okkur hefur gengið vel samkvæmt öllum úttektum að gera einmitt það. Við tökum fullan þátt í alþjóðlegu samstarfi til að auka velmegun og velsæld landsmanna á grundvelli sanngirni, frjálsra viðskipta og friðar.
Við gerum skýra kröfu um að lög og reglur séu virt og þegar einhver brýtur gegn þessum grundvallargildum gerum við ráð fyrir að slíkt hafi afleiðingar. Við viljum að þar til bærar stofnanir upplýsi, taki ákvörðun um ákæru og dæmi eins og efni eru til. Þannig viljum við að hlutirnir virki, vegna þess að það er rétt. Og það er meðal annars þess vegna sem Ísland skipar sér í flokk með þeim þjóðum heimsins þar sem spilling er minnst.
Þetta er nauðsynlegt að hafa í huga þegar einstaka stjórnmálamenn stíga nú fram og tala um Ísland sem megnasta spillingarbæli. Það skiptir miklu, þegar einstök mál koma upp sem nauðsynlegt er að rannsaka opinberlega, að halda þeim grunngildum á lofti sem tryggt hafa góða stöðu okkar og framúrskarandi lífskjör. Fyrir þeim árangri höfum við barist í kynslóðir og eigum að segja þá sögu með stolti.“
Þess má geta að Helga Vala Helgadóttir, þingmaður Samfylkingarinnar, gagnrýndi orð Bjarna í Morgunblaðsgrein í dag vegna viðbragða hans við Samherjamálinu í gær.
Bjarni sagði í viðtali að rót vandans hjá Samherja væri spillingin í Afríku:
„Það er nú kannski líka það sem er sláandi og svo sem lengi vitað að spillingin í þessum löndum – auðvitað er rót vandans í þessu tiltekna máli veikt og spillt stjórnkerfi í landinu. Það virðist vera einhvers konar rót alls þess sem við erum að sjá flett ofan af.“
Helga segir að Bjarni sé með þessu að koma sökinni yfir á aðra:
„Með öðrum orðum er fjármálaráðherra að segja að mögulegt mútubrot, peningaþvætti, skattalagabrot og fleira sem fyrirsvarsmenn Samherja eru nú grunaðir um að hafa ástundað í einu fátækasta ríki heims, megi rekja til spillts stjórnkerfis þar í landi. Að þetta sé, svo vísað sé til orða ráðherrans, ekki á nokkurn hátt afrakstur þeirrar sjávarútvegsstefnu sem rekin hefur verið hér á landi, aðallega í boði Sjálfstæðisflokksins. Ekki heldur vegna þess hvernig stórútgerðinni hefur verið gert kleift að sölsa undir sig allar fiskveiðiheimildir landsins árum saman, heldur af því að stjórnmálamenn suður í Afríku séu bara svona spilltir,“
segir Helga Vala og lýkur greininni á þessum orðum:
„Má ætla að fjármálaráðherra þurfi á smá sjálfsskoðun að halda?“
