„Þetta er ein ruddalegasta húsleit sem hefur verið framkvæmd á Íslandi og hún var gerð í samstarfi við RÚV, þeir voru mættir á undan og greinilega allt þaulskipulagt, það hefur aldrei farið á milli mála, og sendar fréttatilkynningar um allan heim,“

sagði Þorsteinn Már Baldvinsson, forstjóri Samherja, í Bítinu á Bylgjunni í morgun.

Hann sagði það alveg ljóst að RÚV væri gerandi í málinu, þegar Seðlabanki Íslands gerði húsleit hjá fyrirtækinu árið 2012 og að stjórnendur Seðlabankans hefðu farið fram með „offorsi“ gegn fyrirtæki sínu.

Verið að búa til glæp

Katrín Jakobsdóttir forsætisráðherra hefur tilkynnt lögreglu um meintan upplýsingaleka frá Seðlabankanum til RÚV. Í bréfi hennar kemur fram að meintur leki kunni að fela í sér refsivert brot.

Þorsteinn sagði í morgun að ákveðinn hópur hafi farið fram með offorsi gegn Samherja, sem hafi hlotið mikinn skaða af vegna þess:

„Er eðlilegt að ríkisfjölmiðill sé að reyna að búa til glæp með með stofnun sem á að vera mesta virðingarstofnun landsins?“

Sagðist Þorsteinn þó ekki ætla að aðhafast neitt frekar gegn RÚV vegna málsins.

Helgi Seljan á þorrablóti

Í bókinni Gjaldeyriseftirlitið eftir Björn Jón Bragason, er greint frá því að Helgi Seljan, fréttamaður Kastljóssins, hafi verið staddur í þorrablóti á Austfjörðum árið 2012, þegar hann hafi fengið upplýsingar um meint brot Samherja. Ku fyrrum sjómaður Síldarvinnslunnar á Neskaupsstað hafa sagt Helga frá vangaveltum sínum um að Samherji væri að selja karfa til dótturfélaga sinna erlendis, á undirverði. Hafi Helgi haldið á fund starfsmanna Gjaldeyriseftirlitsins í kjölfarið og hafi Samherji verið á allra vörum upp frá því.

Andrés Magnússon, blaðamaður á Viðskiptablaðinu, hefur kallað eftir skýringum frá Kastljósinu á sínum þætti í Samherjamálinu svokallaða og krafist afsökunarbeiðni frá þeim:

„Þessar lyktir málsins, ríflega sex árum síðar, hljóta að kalla á frekari skýringar Kastljóss, viðurkenningu á að fréttin hafi reynst röng og afsökunarbeiðni. Eitthvað hefur greinilega verið bogið við gögnin, vinnslu þeirra eða heimildamennina (sem hljóta að hafa verið fleiri en einn). Nema auðvitað að RÚV sé búið að semja um himinháa greiðslu til Samherja án þess að segja neinum.“

Sjá einnig: Krefur Kastljósið um afsökunarbeiðni:„Nema auðvitað að RÚV sé búið að semja um himinháa greiðslu“