Ída Marín Hermannsdóttir gerir samning við Íslandsmeistara Vals út keppnistímabilið 2021. Ída sem fædd er árið 2002 lék sinn fyrsta leik með meistaraflokki Fylkis 2016 og hefur leikið 48 leiki og skorað í þeim 11 mörk.

Hún er einn af lykilmönnum U19 ára landsliðs Íslands sem tryggði sér sæti í milliriðli EM á dögunum, Ída á að baki 22 leiki fyrir yngri landslið íslands. Ída er dóttir Hermanns Hreiðarssonar og Rögnu Lóu Stefánsdóttir, bæði fyrrum landsliðsmenn.

Pétur Pétursson
„Það er fagnaðarefni að fá Ídu Marín til liðs við Val, Ída hefur sýnt að hún er frábær leikmaður og við hlökkum mikið til að vinna með henni á næstu árum“

Ída Marín
“Ég vil byrja á því að þakka uppeldisfélagi mínu Fylki fyrir frábæran tíma, ég vil sérstaklega þakka þjálfurum liðsins fyrir að gefa mér stórt hlutverk og tækifæri til þess að þroskast sem leikmaður.

Ég er ótrúlega ánægð að fá tækifæri til þess að ganga til liðs við Íslandsmeistaranna í Val. Framundan eru spennandi tímar og nýjar áskoranir. Ég tel það vera rétt skref fyrir mig á þessum tímapunkti að skipta um umhverfi. Í Val mun ég vinna með frábæru þjálfarateymi og samkeppnin um sæti í liðinu verður frábær áskorun, sem ég hlakka til að kljást við. Ég get ekki beðið eftir að byrja og hlakka til að kynnast góðu fólki á Hlíðarenda”.