Athafnakonan og gleðigjafinn Margrét Erla Maack er ólétt af sínu fyrsta barni. Það styttist óðum í litla krílið og eru um þrjár vikur í settan dag.
Margrét Erla segist hafa reynt að átta sig á fæðingarorlofskerfinu á Íslandi síðan hún komst að því að hún væri ólétt í febrúar.
„Síðustu samskipti mín við fæðingarorlofssjóð benda til að ég hafi afskaplega takmarkaðan rétt á fæðingarorlofi þar sem þeir mánuðir sem þau líta á til viðmiðunar teljast ekki vera full innkoma að þeirra mati. Þetta er ósanngjarnt, þar sem eðli vinnu minnar er fljótandi, stundum er mikið að gera og stundum ekki neitt,“ segir Margrét Erla á hópfjármögnunarsíðu sinni á Karolina Fund.
Margrét Erla hefur hrint af stað söfnun fyrir fæðingarorlofi sínu og getur fólk fengið ýmislegt í skiptum fyrir að styrkja hana.
„Með því að styrkja fæðingarorlofið ertu í raun að kaupa þér alls kyns skemmtun á útsöluverði, sem ég mun efna að fæðingarorlofi loknu þegar Tómas faðir hennar, sem er í „alvöru vinnu,“ tekur við fæðingarorlofskeflinu. Ég er að reyna að safna um 500.000 sem eru 100.000 per mánuð í orlofinu sem ég hyggst taka mér, eftir að efniskostnaður, sendingargjöld og salarleiga hefur verið innt af hendi.“
Flókið fæðingarorlofskerfi
Margrét Erla segir tilgang söfnunarinnar vera tvíþættur:
„Í fyrsta og mikilvægasta lagi að gera mér kleift að sinna barninu mínu fyrstu mánuði lífs þess. Í öðru lagi að benda á hversu flókið fæðingarorlofskerfið er fyrir þau sem kjósa að vinna sjálfstætt og flæða á milli verkefna. Eins og staðan er í dag er fæðingarorlof lúxus sem foreldrar í frumkvöðlastarfi og sjálfstætt starfandi geta takmarkað nýtt sér. Það álag sem óskýr svör hefur á barnshafandi konur ekki líðandi.“
Þú getur lesið meira um söfnun Margrétar Erlu á Karolina Fund.