Umfang brotanna nemur um sautján milljónum króna. Ákæran mun verða þingfest eftir helgi í Héraðsdómi Suðurlands.
Í frétt RÚV kemur það ekki fram hver maðurinn er en við nánari athugun DV var komist að því að maðurinn sem um ræðir er Guðjón Þór Emilsson. DV hafði samband við Guðjón en hann vildi ekki tjá sig um málið.
Guðjón viðurkenndi í mars fyrir tveimur árum að hann hafði notað viðskiptakort björgunarfélagsins til að kaupa eldsneyti. Á meðan að rannsókn lögreglu stóð yfir var Guðjóni vikið frá störfum. Í tilkynningu frá björgunarfélaginu kom fram að reikningar félagsins frá síðustu árum yrðu nú skoðaðir gaumgæfilega.
„Félagar í Björgunarfélagi Árborgar líta málið alvarlegum augum og harma að gjaldkerinn fyrrverandi hafi brugðist trausti þeirra með þessum hætti.“
Í ákærunni er sagt að Guðjón hafi dregið að sér rúmar 14 milljónir af reikningi björgunarfélagsins á árunum 2010 til 2017. Hann er sagður hafa gert það með reiðufjárúttektum, greiðslu reikninga og með millifærslum út af bankareikningi félagsins yfir á sinn eigin reikning og reikning eiginkonu sinnar. Samtals eru þetta 177 tilvik.
Einnig er Guðjón ákærður fyrir umboðssvik. Guðjón er sagður hafa misnotað aðstöðu sína sem gjaldkeri í ákærunni en hann notaði kreditkort félagsins 57 sinnum á árunum 2014 til 2016. Með kreditkortinu greiddi hann fyrir vörur og þjónustu til eigin nota. Hann er sagður hafa látið björgunarfélagið borgað fyrir vörur hjá Toyota á Selfossi auk áskriftar að 365 miðlum.
Einnig er sagt að Guðjón hafi notað viðskiptareikninga björgunarfélagsins hjá fyrirtækjum eins og Byko og Húsasmiðjunni alls 18 sinnum á þriggja ára tímabili. Þessar greiðslur voru með öllu ótengdar störfum hans fyrir björgunarfélagið.
Að lokum er Guðjón ákærður fyrir að nota sex eldsneytiskort félagsins 186 sinnum á sjö ára tímabili. Myndbandsupptaka náðist af honum þar sem hann sást nota tvö af þessum kortum.
