Fyrrverandi heimsmeistari í skák, Garry Kasparov, er höfundur nýrrar bókar þar sem hann fjallar um skáktölvur og mannshugann. Bókin heitir Deep Thinking: Where Machine Intelligence Ends and Human Creativity Begins. Kasparov fjallar meðal annars um skákviðureign sína við ofurtölvuna Deep Blue árið 1997, en hann tapaði fyrir henni, eins og frægt varð. Hann segir ástæðuna vera einfalda, hann hafi teflt illa.

Kasparov býr í New York ásamt þriðju eiginkonu sinni, Daiu, og tveimur börnum þeirra, tíu og tveggja ára. Fjölskyldan eyðir einnig miklum tíma í Króatíu. Kasparov flutti frá Rússlandi fyrir fjórum árum og hefur ekki komið þangað síðan. Hann er harður andstæðingur Pútíns og er ósmeykur við að ræða opinskátt um þau fólskuverk sem hann telur Pútín bera ábyrgð á. Hann sagði nýlega í viðtali við bresku pressuna að hann teldi útilokað að Pútín gæti teflt skák. „Einræðisherrar tefla ekki skák. Pútín getur ekki hugsað fram í tímann. Einræðisherrar hugsa um daginn í dag og daginn á morgun.“

Kasparov segist ekki geta verið öruggur um líf sitt í Rússlandi. „Ég mun ekki fara aftur til Rússlands. Ég er tilbúinn að taka áhættu, en ég er ekki heimskur,“ segir hann. Móðir hans, sem er áttræð, býr í Rússlandi og hann talar við hana á hverjum degi í síma. Þau hittast nokkrum sinnum á ári og þá í Tallinn í Eistlandi, Vilníus í Litháen eða Króatíu.