„Það stendur ekki til að úthýsa kjöti úr mötuneytum borgarinnar. Hvorki leynt né ljóst.“ Þetta skrifar Líf Magneudóttir, borgarfulltrúi VG á Facebook í dag. Tilefnið er frétt Vísis upp úr færslu hennar frá því í gær, hvar hún lýsti þeirri skoðun sinni um að minnka bæri, eða afnema með öllu, kjötframboð í mötuneytum borgarinnar og auka grænmetisfæði.
Sagði Líf að meirihluti borgarstjórnar væri samstíga í þessari afstöðu hennar:
„Við ættum að draga verulega úr framboði dýraafurða eða hætta alfarið að bjóða upp á þær í mötuneytum borgarinnar. Ég held að langflestir sem kynni sér þessi mál sjái að þetta er bæði skynsamlegt og hollt og gott til framtíðar. Ég er líka ánægð að við í meirihlutanum eru samstíga í þessum pælingum.“
Í færslu sinni í dag, sem Líf segir að sé leiðrétting á rangfærslum í frétt Vísis, virðist sem að meirihlutinn hafi skyndilega orðið ósamstíga um málið:
„Meirihlutinn er ekki samstíga um það – sem ranglega er haldið fram – að taka allt kjöt úr mötuneytum. Hann er hins vegar samstíga um að koma Matarstefnu Reykjavíkur til framkvæmda og skoða alla þætti í rekstri borgarinnar í ljósi loftslagsbreytinga af mannavöldum. Hann er samstíga í því að auka val og auka frelsi fólks í borginni og að því sögðu má m.a. nefna það að auka grænmetis- og grænkerafæði,“
segir Líf í dag og deilir frétt Vísis, þar sem Sigmar Vilhjálmsson, talsmaður FESK (Félag eggja-, svína- og kjúklingabænda) viðrar áhyggjur sínar um málið ef af verði, en bændur hafa lýst andstöðu sinni við slíkar fyrirætlanir, enda stórt hagsmunamál ef þær 23 þúsund daglegu máltíðir á vegum Reykjavíkurborgar, innihéldu ekkert kjöt.
Líf viðurkennir síðan að skoðanir sínar um kjötleysi séu einnig umdeildar innan meirihlutans.
Blaðamaður Vísis, Jakob Bjarnar Grétarsson, svarar þessari „leiðréttingu“ í athugasemdarkerfinu hjá Líf og bendir henni á að hún hafi sjálf sagt að meirihlutinn væri samstíga í fyrri færslu sinni og til þess væri vísað í fréttinni:
„Nú hefur það greinilega gerst að viðbrögðin við þessum orðum þínum eru ekki í samræmi við væntingar. Þá er um að gera að skella skuldinni bara á blaðamanninn.“
Þessu svarar Líf til að hún hefði kannski mátt orða hlutina öðruvísi:
„Svona svona – nú er ég að leiðrétta en ekki skella skuldinni á blaðamann. Þú hefðir líka getað hringt í mig. Það sér hver maður að það er nokkuð langt seilst að segja að meirihlutinn sé til í að úthýsa kjöti. Ekki satt? En kannski hefði ég betur átt að orða hlutina og segja – samstíga um að auka grænmetisfæði. Ég skal bara taka þessa handvömm á mig og þetta leiðréttist hér með.“
