Höfundur Reykjavíkurbréfs Morgunblaðsins um helgina, ritstjórinn Davíð Oddsson, fjallar meðal annars um væntanlega heimsókn varaforseta Bandaríkjanna, Mike Pence, hingað til lands í byrjun september.

Líkt og kunnugt er þá hefur Katrínu Jakobsdóttur forsætisráðherra, snúist hugur með að vera fjarverandi meðan á heimsókn hans stendur yfir, líkt og hún var harðlega gagnrýnd fyrir, bæði af samherjum og mótherjum í pólitík. Það fer þó allt eftir því hvort Pence vilji framlengja heimsókn sína.

Davíð spyr hvort þessi ákvörðun Katrínar hafi verið borin undir ríkisstjórnina, eða Guðlaug Þór Þórðarson, utanríkisráðherra, en heimsókn Pence er á vegum utanríkisráðuneytisins:

„En þá er það spurningin: Samþykktu ráðherrar hinna stjórnarflokkanna í ríkisstjórninni þessa einstæðu forgangsröðun forsætisráðherrans? Þá eru allir spurðir nema utanríkisráðherrann, sem hefur þegar tekið fram í viðtali við Morgunblaðið að hann hafi ekki vitað neitt um málið. Enda málið á hans verksviði. En hinir?“

Þarna virðist Davíð gefa í skyn að Guðlaugur Þór sé almennt illa upplýstur, eða sé af einhverri ástæðu ekki hafður með í ráðum í málinu.

Öfug Keflavíkurganga

Davíð grínast einnig með heimsókn Pence er hann segir:

„En nú hefur Katrín forsætisráðherra sagt að hún sé eftir allt saman tilbúin að tala við Pence varaforseta ef hann „framlengi heimsókn sína“. Kannski er reynandi að bjarga þessum vandræðagangi ríkisstjórnarinnar með því að koma varaforsetanum fyrir á háalofti í Keflavík, svo að forsætisráðherrann geti með fylktu liði, rauðum fánum, lúðrablæstri og söng, farið þangað í öfugri keflavíkurgöngu á hans fund. Það hafa sprottið fram illagróin hælsæri af minna tilefni.“