Á morgun mun gamli fimm punda seðillinn, gefinn út af Seðlabanka Englands, missa gildi sitt og verður verslunum og öðrum þeim sem taka við peningum þá heimilt að neita því að taka við seðlinum. Íslendingar þurfa þó ekki að hafa áhyggjur þó að fimm punda seðlar leynist inni í fóðrinu á gömlum jökkum eða á botninum á ferðatöskunni sem síðast var tekin með í ferð til London. Bankar hér á landi munu áfram taka við seðlunum.

Nýir fimm punda seðlar, gerðir út plasti, komu í umferð í október á síðasta ári og síðan þá hefur Seðlabanki Englands gefið kaupmönnum þau skilaboð að skila gömlu seðlunum inn og fá nýja í staðinn. Eftir morgundaginn er engin trygging fyrir því að tekið verði við gömlu seðlunum í verslunum. Bretar eru því hvattir til að fara í sparibaukana sína og skipta fimm pundaseðlunum áður en þeir lenda í vandræðum. Hins vegar verður hægt að skila gömlum fimm pundaseðlum til Seðlabanka Englands sjálfs um alla framtíð.

En ekki nóg með þetta heldur var ný eins punds mynt sett í umferð 28. mars síðastliðinn. Gömlu eins punda myntirnar verða teknar úr umferð 15. október næstkomandi. Þær munu hins vegar ekki, ólíkt gömlu fimm punda seðlunum, halda verðgildi sínu til framtíðar. Þó er nokkuð á reiki hvort hægt verði að skila þeim í banka eftir þann tíma en sérfræðingar, þar á meðal fjármálaráðuneytið breska, hafa hvatt fólk eindregið til að tæma sparibauka, söfnunarbauka og krukkur og eyða pundunum eða skila þeim inn í banka. Talið er að allt að 1,3 milljarðar gömlu eins punda myntanna séu í sparibaukum og krukkum víðsvegar um Bretland.

Samkvæmt upplýsingum frá Arionbanka þurfa Íslendingar sem eiga fimm punda seðla í fórum sínum ekki að hafa áhyggjur því áfram verður hægt að skila þeim inn í bankann og skipta í íslenskar krónur, eða nýja fimm punda seðla. Myntinni verður hins vegar ekki hægt að skila, frekar en annarri erlendri mynt.