Aldur er afstæður en oft getur það komið á óvart hve ólíkir jafnaldrar eru. DV ákvað því að fara yfir aldur nokkurra landsþekktra Íslendinga og kom margt á óvart þegar leitað var að jafnöldrum.

1996 – Aníta og Sunneva

Frjálsíþróttakonan Aníta Hinriksdóttir og áhrifavaldurinn Sunneva Eir Einarsdóttir hafa kosið mismunandi leiðir í lífinu en þær eru báðar fæddar á því herrans ári 1996 – Aníta í janúar, Sunneva í ágúst.

1990 – Aron og Jóhanna

Handknattleiksmaðurinn Aron Pálmarsson og Eurovision-hetjan Jóhanna Guðrún eru bæði fædd árið 1990.

1989 – Eyþór og Gylfi

Fótboltakappinn Gylfi Þór Sigurðsson er fæddur í september árið 1989 en söngvarinn Eyþór Ingi Gunnlaugsson í maí sama ár.

1984 – Smári og Tobba

Aðgerðasinninn Smári McCarthy er fæddur 7. febrúar árið 1984. Tobba Marinós er hins vegar fædd 7. desember sama ár.

1982 – Ágústa og Ásmundur

Leikkonan Ágústa Eva Erlendsdóttir og stjórnmálamaðurinn Ásmundur Einar Daðason eru fædd sama ár, þótt ótrúlegt megi virðast.

1980 – Pawel og Auddi

Stjórnmálamaðurinn Pawel Bartoszek og fjölmiðlamaðurinn Auðunn Blöndal eiga líklegast ekki mikið sameiginlegt. Þeir eru hins vegar fæddir sama ár.

1979 – Hafdís, Birgitta og Guðjón Valur

Tónlistarkonurnar Hafdís Huld og Birgitta Haukdal eru jafngamlar handboltakappanum Guðjóni Val Sigurðssyni.

1978 – Eiður, Erla og Jógvan

Árið 1978 var stórt ár. Þá komu til að mynda í heiminn knattspyrnugoðsögnin Eiður Smári Guðjohnsen, Erla Hlynsdóttir, fyrrverandi framkvæmdastjóri Pírata, og söngvarinn Jógvan Hansen.

1977 – Svala og Jónsi

Tónlistarfólkið Svala Björgvins og Jón Jósep Snæbjörnsson, Jónsi, eiga sama afmælisár.

1976 – Mugison, Lárus og Katrín

Forsætisráðherra vor, Katrín Jakobsdóttir, fæddist þann 1. febrúar árið 1976. Í september það sama ár kom tónlistarmaðurinn Mugison í heiminn og í desember fæddist athafnamaðurinn Lárus Welding.

1973 – Óli og Óli

Leikarinn Ólafur Darri Ólafsson og handboltahetjan Ólafur Stefánsson eiga ekki mikið sameiginlegt nema fæðingarárið.

1970 – Anna, Bjarni og Páll Óskar

Söngkonan Anna Mjöll Ólafsdóttir og Bjarni Benediktsson fjármálaráðherra fæddust bæði í janúar árið 1970. Í mars það sama ár kom síðan tónlistarmaðurinn Páll Óskar Hjálmtýsson í heiminn.

1967 – Gnarr, Bjöggi og Birgitta

Jón Gnarr hefur margoft sagt frá því að hann eigi afmæli 2. janúar, á sjálfum talningardeginum. Jón fæddist árið 1967 líkt og kaupsýslumaðurinn Björgólfur Thor Björgólfsson og þúsundþjalasmiðurinn Birgitta Jónsdóttir.

1965 – Bjarkey og Björk

Óvíst er hvort stjórnmálakonan Bjarkey Gunnarsdóttir sé söngelsk en hún er jafngömul Björk okkar Guðmundsdóttur.

1957 – Bergþór og Lilja

Söngvarinn Bergþór Pálsson kom syngjandi í heiminn árið 1957, líkt og stjórnmálakonan Lilja Rafney Magnúsdóttir.

1955 – Siggi, Steingrímur, Diddú og Einar

Margir landsþekktir einstaklingar fæddust árið 1955, til að mynda Siggi Sigurjóns leikari, Steingrímur J. Sigfússon pólitíkus, söngkonan Diddú og rithöfundurinn Einar Kárason.

1948 – Davíð og Ari

Davíð Oddsson, ritstjóri Morgunblaðsins, er jafngamall jarðfræðingnum og stjórnmálamanninum Ara Trausta Guðmundssyni.