Skortur á húsnæði er vandamál víðar en á Íslandi því í mörgum borgum Evrópu er vöntun á húsnæði. Bresk yfirvöld sögðu í haust að byggja þyrfti allt að eina milljón íbúða á næstu fjórum árum til að svara vaxandi eftirspurn og vöntunin er svipuð í mörgum öðrum ríkjum.

Huggulegt Húsin eru lítil en plássið nýtist vel.

NestinBox er hugmynd sem kemur frá sænsku fyrirtæki sem heitir Moderna Tr hus, en fyrirtækið hefur varpað fram áhugaverðri hugmynd í átt að lausn á húsnæðisvandanum, en í stuttu máli felur hugmyndin í sér að byggja minna og nýta byggingasvæði betur.

Eins og sést á meðfylgjandi myndum fela hugmyndir fyrirtækisins meðal annars í sér að byggja heimili utan í hlíðum og klettaveggjum sem standa ónotaðir víðast hvar. Með þessu móti væri hægt að þétta byggðir jafnvel enn frekar og þá myndu byggingar af þessu tagi stuðla að lægra íbúðaverði á svæðum þar sem eftirspurn eftir húsnæði er mikil.

Teikningar gera ráð fyrir að húsin sem sjást á myndunum séu um 50 fermetrar að stærð, með 1 til 2 svefnherbergjum, eldhúsi, stofu og baðherbergi. Húsin yrðu á tveimur til þremur hæðum, allt eftir óskum og þörfum kaupenda.

„Í mörgum borgum er vöntun á byggingalandi sem aftur leiðir til hærra verðs fyrir byggingasvæði. Og á sama tíma er vöntun á húsnæði. Mannfjöldinn eykst ár frá ári og eins og staðan er í dag er ekki endilega pláss fyrir okkur öll,“ segir arkitektinn og hugmyndasmiðurinn Michel Silverstorm sem starfar hjá Moderna Tr hus.

„En það er ekkert sem segir að við þurfum að byggja hús sem standa á flatlendi, við getum lært frá dýrunum. Mörg dýr, fuglar til dæmis, byggja sér hreiður í trjám, á þökum eða í klettum,“ bætir hann við og segir enn fremur: „Við mannfólkið gætum gert það sama.“

Ljóst er að þó hugmyndir Moderna gangi ekki allsstaðar eru þær allrar athygli verðar og gætu eflaust nýst víða. Michel bendir til dæmis á norðurhluta Skandinavíu, Noreg og Svíþjóð, sem dæmi um staði þar sem hægt væri að koma hugmyndinni í verk.